Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 156 Hüküm no: 112 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Sâliha Hatun’un kocası Esirci Ali Çelebi’deki mehir alacağının da terekeye dahil edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Defterdâr Kara Süleyman Mahallesiʼnde sâkine iken bundan akdem vefât eden Sâliha Hatun bt. Abdullah’ın verâseti zevc-i metrûku Esirci Ali Çelebi b. Abdullah ile babası Abdullah Çelebi b. Abdullah’a münhasıra olduğu şer‘an zâhir ve müteʻayyen oldukdan sonra mezbûr Abdullah Çelebi meclis-i şer‘-i şerîf-i enverde müteveffât-ı mezbûrenin zevci ve terekesine bi’l-verâse vâzıʻu’l-yed olan işbu râfiʻü’l-kitâb mezbûr Ali Çelebi mahzarında bi’l-verâse üzerine da‘vâ ve takrîr-i kelâm edip kızım müteveffât-ı mezbûrenin zevci merkūm Ali Çelebi zimmetinde mütekarrer ve ma‘kūdün-aleyh üç bin beş yüz akçe mehr-i müeccel hakkı olmağla meblağ-ı mezbûru tereke-i müteveffât-ı mezbûreye bi’l-verâse idhâl murâd ederim, suâl olunsun dedikde gıbbe’s-suâl mezbûr Ali Çelebi cevâbında zevcesi müteveffât-ı mezbûre Sâliha Hatun’a meblağ-ı mezbûr üç bin beş yüz akçe zimmetinde mehr-i müeccel deyn olduğunu ikrâr lâkin zevcem müteveffât-ı mezbûre Sâliha Hatun bt. Abdullah b. Abdullah fevtinden bir sene mukaddem meblağ-ı mezbûrdan üç bin akçesini huzûr-ı Müslimîn’de kendüye tamamen edâ ve teslîm edip ancak zimmetimde beş yüz akçe mehr-i müeccel deynim bâkī kalmışdır deyü def‘le mukābele edicek, gıbbe’l-istintak ve’l-inkâr dâfiʻ-i mezbûr Ali Çelebi’den [28b] def‘-i meşrûhunu mutâbık mütebeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Abdullah Çelebi b. Ebûbekir ve es-Seyyid Mehmed b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffât-ı mezbûre Sâliha Hatun bt. Abdullah b. Abdullah fevtinden bir sene mukaddem işbu zevc-i merkūm Ali Çelebi zimmetinde mütekarrer ve ma‘kūdün-aleyh üç bin beş yüz akçe mehr-i müeccel hakkından üç bin akçesini bizim huzûrumuzda yedinden tamamen ahz u kabz edip ancak zimmetinde beş yüz akçe mehr-i müeccel deyni bâkī kalmışdır, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm meblağ-ı bâkī-i mezbûr beş yüz akçeyi edâ ve teslîme tenbîh-birle mâ-vaka‘a bi’t-taleb ketb olundu. Fi’l-yevmi’t-tâsiʻ aşer min-Şaʻbâni’l-muʻazzam li-sene semân ve hamsîn ve mi’e ve elf. Şuhûdü’l-hâl: Müezzin Ali Efendi b. Mehmed, Süleyman Çelebi b. Mehmed, Abdullah Çelebi b. Mehmed, Ahmed Efendi b. Halil, es-Seyyid Mehmed Çelebi b. es-Seyyid Mustafa, Hüseyin Çelebi b. Mehmed, Mehmed b. Abdullah.