Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 160 Hüküm no: 115 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un vârislerinin terekeden hisselerini alarak birbirlerinin zimmetlerini ibra etmeleri Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Bıçakçı Ferhad Mahallesiʼnde sâkine iken bundan akdem vefât eden Ümmügülsüm Hatun bt. Halil’in hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin verâseti zevc-i metrûku Rüstem Bey b. Abdullah ile vâlidesi Fâtıma Hatun bt. İbrahim’e ve li-ebeveyn er karındaşı Mustafa’ya münhasıra ve tashîh-i meseleleri altı sehmden i‘tibâr olunup sihâm-ı mezbûreden üç sehmi zevc-i mezbûr Rüstem Bey’e ve iki sehmi vâlidesi mezbûre Fâtıma Hatun’a ve bir sehmi karındaşı merkūm Mustafa’ya isâbeti tahakkukundan sonra merkūm Mustafa meclis-i ma‘kūd-ı mezkûrda müteveffât-ı mezbûrenin terekesine bi’l-verâse vâzıʻateyi’l-yed olan işbu râfiʻayü’l-kitâb mezbûrân Rüstem Bey ve vâlidesi Fâtıma Hatun mahzarlarında bi’l-verâse ikrâr-ı tâm ve takrîr-i kelâm edip kız karındaşım müteveffât-ı mezbûrenin terekesi tahrîr ve ba‘de ihrâci’l-mesârif ber-mûceb-i defter-i kassâm tashîh-i merkūm üzere bir sehm hisseme isâbet eden dört bin dört yüz on bir akçeyi terekeden olmak üzere mezbûrân Rüstem Bey ve vâlidem Fâtıma Hatun bana def‘ ve teslîm, ben dahi ber-vech-i muharrer meblağ-ı mezbûru yedlerinden bi’t-tamam ve’l-kemâl ahz u kabz eyledim, baʻde’l-yevm kız karındaşım müteveffât-ı mezbûrenin terekesine müte‘allika âmme-i mîrâs da‘vâsından mezbûrân Rüstem Bey ve vâlidem Fâtıma Hatun’un zimmetlerini ibrâ-i âmm-ı kātıʻu’n-nizâ‘la ibrâ ve ıskāt eylediğimde ânlar dahi kezâlik benim zimmetimi ibrâ ve ıskāt edip vechen mine’l-vücûh ve sebeben mine’l-esbâb katʻâ birbirimiz ile husûs-ı mîrâsa müte‘allika da‘vâ ve nizâ‘ımız yokdur dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Hüseyin Ağa b. Abdullah, Mustafa Çelebi b. el-Hâc Mehmed, Veliyüddin Çelebi b. İbrahim, Debbâğ Mustafa Çelebi [b.] el-Hâc Ali, Abdullah Çelebi b. Abdullah, es-Seyyid Mehmed Çelebi b. es-Seyyid Mustafa, es-Seyyid Ahmed b. es-Seyyid Mehmed, es-Seyyid Ömer, Hüseyin Çelebi b. Mehmed.