Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 161 Hüküm no: 116 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin vasiyyetini yerine getiren vasisi Molla Mustafa b. Osman’ın görülen muhasebesi Dergâh-ı âlî -dâme mahfûfen bi’l-maʻâlî- cebecilerinden olup medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Davud Ağa Mahallesiʼnde sâkin iken bundan akdem vefât eden Osman Beşe b. Abdullah’ın sülüsünü tenfîze bâ-hüccet-i şer‘iyye vasiyy-i muhtârı olan Mollâ Mustafa b. Osman’ın üzerine kıbel-i şer‘den hasbî nâzırı olan es-Seyyid Mehmed b. es-Seyyid Mustafa ma‘rifetiyle vasiyy-i mezbûrun görülen muhâsebesi defteridir ki ber-vech-i âtî zikr olunur. Fi’l-yevmi’s-sâbiʻ min-Recebi’l-ferd sene semân ve hamsîn ve mi’e ve elf. Ber-mûceb-i defter-i kassâm vasiyy-i mezbûrun sülüsünden makbûzu, meblağ: 3.916. Minhâ el-mesârif: Müteveffâ-yı mezbûrun ıskāt-ı salât için vasiyy-i mezbûr masrûfu 1.000 akçe Müteveffâ-yı mezbûrun Hüseyin zimmetinde vasiyy-i mezbûrun fukarâya verdiği 200 akçe [29b] Müteveffâ-yı mezbûrun eyyâm-ı mu‘tâde[de] tabh-ı taʻâm ve itʻâm-ı fukarâ için vasiyy-i mezbûrun masrûfu 641 akçe Müteveffâ-yı mezbûr için iştirâ olunan mushaf-ı şerîf kıymeti ber-mûceb-i vasiyyet vasiyy-i mezbûrun verdiği 1.200 akçe Harc-ı defter 200 akçe Kalemiye-i kâtib 90 akçe Çukadâriye ve hüddâmiye 90 akçe Harc-ı hüccet-i vesâyet 480 akçe Kaydiye-i defter 15 akçe Yekûn: 3.916 akçe. Vasiyy-i mezbûr Mollâ Mustafa nâzır-ı merkūm es-Seyyid Mehmed ma‘rifetiyle muhâsebesi görülüp sülüsden makbûzu olan bâlâda mezkûr üç bin dokuz yüz on altı akçeyi ma‘rifet-i şer‘le harc u sarf edip meblağ-ı mezbûrdan vasiyy-i merkūm Mollâ Mustafa’nın yedinde ve zimmetinde bir akçe ve bir habbe bâkī kalmayıp tahlîf olunduğu işbu mahalle şerh verildi.