Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 167 Hüküm no: 122 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe Hatun’nun vefât eden annesi Hatice Hatun’dan intikal eden eşyalarını babası el-Hâc Mehmed Efendi’ye satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Fethi Çelebi Mahallesiʼnde sâkine iken bundan akdem vefât eden Hadice Hatun bt. Yusuf’un verâseti zevc-i metrûku el-Hâc Mehmed Efendi b. İbrahim Efendi ile sadriye kebîre kızı Habibe Hatun’a münhasıra ve tashîh-i meselesi dört sehmden i‘tibâr olunup sihâm-ı mezbûreden bir sehmi zevc-i merkūm el-Hâc Mehmed Efendi’ye ve üç sehmi kızı mezbûre Habibe Hatun’a isâbeti tahakkukundan sonra zâtı Müezzin Hüseyin Efendi b. Mehmed ve Maksudzâde Mustafa Çelebi b. Ali ta‘rîfleriyle mu‘arrefe olan müteveffât-ı mezbûrenin kızı mezbûre Habibe Hatun meclis-i şer‘-i şerîf-i enverde babası işbu râfiʻü’l-kitâb merkūm el-Hâc Mehmed Efendi mahzarında ikrâr-ı tâm ve takrîr-i kelâm edip vâlidem müteveffât-ı mezbûrenin terekesinden bir çift inci kuşak ve bir inci köstek ve bir inci kolan ve iki akreb sâʻat ve bir inci ayna ve bir sim gülabdân ma‘a buhûrdân ve iki inci hamâyülü ve yakut ve gök iki aded yüzük ve bir altın hatem yüzük ve on bir köhne çatma yasdık ve yedi köhne mor kadife yasdık ve yedi minder ve zümrüd iki tek iğne ve bir çatal ve yirmi vakıyye evânî-i nuhâs ve iki yorgan ve iki ayna ve bir orta keçesinden tashîh-i merkūm üzere üç sehm hissemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile babam merkūm el-Hâc Mehmed Efendi’ye on yedi bin üç yüz beş akçeye beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr on yedi bin üç yüz beş akçe mütâlebesinden babam merkūm el-Hâc Mehmed Efendi’nin zimmetini ibrâ-i âmm-ı kātıʻu’n-nizâ‘la ibrâ ve ıskāt eyledim, baʻde’l-yevm eşyâ-i muharrere-i mezkûre babam merkūm el-Hâc Mehmed Efendi’nin irsen ve şirâen mülkü olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’t-târîhi’l-mezbûr li-seneti’l-merkūme. Şuhûdü’l-hâl: Eş-Şâhidûnü’s-sâbıkūn.