Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 166 Hüküm no: 121 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe Hatun’un bir takım eşyaları ile cariyesini babası el-Hâc Mehmedʼe satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Fethi Çelebi Mahallesiʼnde sâkine olup zâtı Müezzin Hüseyin Efendi b. Mahmud ve Maksudzâde Mustafa Çelebi b. Ali ta‘rîfleriyle mu‘arrefe olan Habibe Hatun bt. el-Hâc Mehmed Efendi meclis-i şer‘-i şerîf-i enverde babası işbu râfiʻü’l-kitâb merkūm el-Hâc Mehmed Efendi b. İbrahim Efendi mahzarında ikrâr-ı tâm ve takrîr-i kelâm edip eşyâ-i memlûkemden bir çift altın bilezik ve bir çift elmas kuşak ve bir elmas zülüflük ve bir sim şamʻdân ve bir elmas zikir ve bir sim maşraba ve bir sim sitil ve dokuz sim fincan zarfı ve bir sim kahve ibriği ve sim tepsi ve bir sim tas ve on bir paşa çatması yasdık ve dört koltuk yasdığı ve dört minder ve üç çuka makʻad ve üç kutnî makʻad ve üç şilte ve beş yüz yasdığı ve dört gömlek ma‘a don ve sekiz hatâî ve keremsûd anteri ve bir keremsûd ma‘a hatâî şalvar ve bir işleme şal ve bu su samuru kürk ve iki kākum kürk ve iki sincab kürk ve on yorgan ve iki döşek ve bir döşek şiltesi ve bir düğme ve iki sûzenî boğça ve yedi çarşeb ve def‘a yedi boğça ve kebîr ve sagīr iki sini ve on beş vakıyye evânî-i nuhâs ve bir orta keçesi ve üç cübbe ve bir sepet sandık ve ortası zümrüd ve laʻl üçer ayaklı bir çift küpe ve sûzen işleme iki sofra ve iki peşkir ve dört eş makramesi ve bir abdest peşkiri ile ma‘lûmü’l-evsâf Arab Rahime nâm câriyeyi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile babam merkūm el-Hâc Mehmed Efendi’ye beş yüz guruşa beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr beş yüz guruş mütâlebesinden babam merkūm el-Hâc Mehmed Efendi’nin zimmetini ibrâ-i âmm-ı kātıʻu’n-nizâ‘la ibrâ ve ıskāt eyledim, baʻde’l-yevm eşyâ-i muharrere-i mezkûre ile câriye-i merkūmede benim katʻâ alâka ve medhalim kalmayıp babam merkūm el-Hâc Mehmed Efendi’nin mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Ramazani’l-mübârek li-sene semân ve hamsîn ve mi’e ve elf. Şuhûdü’l-hâl: Mahmud Efendi b. Hüseyin Efendi el-İmâm, Müezzin Hüseyin Efendi b. Mahmud, Mollazâde Mehmed Efendi b. Ahmed Efendi, Osman Beşe b. Ahmed, es-Seyyid İbrahim b. Hasan, İbrahim Ağa b. Ali, Osman Çelebi b. ( ), Mustafa Çelebi b. Ali, Ahmed Efendi b. Mustafa Efendi, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, Mehmed Said Efendi b. Mustafa, Hüseyin Çelebi b. Mehmed.