Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 177 Hüküm no: 131 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmedʼin vârislerinden kardeşi Kapıkethüdası Mehmed Ağa ile hanımı Ayşe Hatun’un terekedeki hisse konusunda sulh olmaları Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkin iken bundan akdem vefât eden el-Hâc Mehmed b. Mehmed’in verâseti zevce-i menkûha-i metrûkesi Âişe Hatun bt. Abdullah ile sulbiye sagīre kızı Hadice’ye ve li-ebeveyn er karındaşı oğlu Kapıkethüdâsı Mehmed Ağa b. Mustafa[‘ya] münhasıra ve tashîh-i meselesi sekiz sehmden i‘tibâr olunup sihâm-ı mezbûreden bir sehmi zevcesi mezbûre Âişe Hatun’a ve dört sehmi kızı sagīre-i mezbûre Hadice’ye ve bâkī üç sehmi kapıkethüdâsı merkūm Mehmed Ağa’ya isâbeti tahakkukundan sonra merkūm kapıkethüdâsı Mehmed Ağa meclis-i şer‘-i şerîf-i enverde müteveffâ-i mezbûrun zevcesi ve sagīre-i mezbûrenin vâlidesi ve tesviye-i umûruna mansûb vasiyyesi olup tereke-i müteveffâ-i mezbûra bi’l-verâse ve bi’l-vesâye vâzıʻatü’l-yed olan işbu râfiʻatü’l-kitâb mezbûre Âişe Hatun’un zevci ve tarafından husûs-ı âti’l-beyânda tasdîka müseccel vekîli olan İbrahim Efendi b. Mehmed mahzarında bi’l-verâse ikrâr-ı tâm ve takrîr-i kelâm edip mûrisim müteveffâ-i mezbûrun kalîl ü kesîr ma‘lûm ve gayr-ı ma‘lûm tereke-i menkūlesinden tashîh-i merkūm üzere isâbet eden üç sehm hissemi müvekkile-i mezbûre Âişe Hatun’dan taleb ve da‘vâ sadedinde olduğumda beynlerimizde münâzaʻât-ı kesîre ve muhâsamât-ı şedîde vâkıʻa olup el-hâletü hâzihî beynimize muslihûn tavassut edip müvekkile-i mezbûre Âişe Hatun ile otuz guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezbûru kabûl ve müvekkile-i mezbûre Âişe Hatun tarafından medfû‘ [33b] bedel-i sulh olan meblağ-ı mezbûr otuz guruş ve müteveffâ-i mezbûrun gāib ani’l-meclis Kassab Halil Yazıcı zimmetinde olmak üzere bâ-temessük yedi yüz kırk beş guruşun tahsîli müteʻassir olduğuna binâen deyn temessüğünü dahi vekîl-i mezbûr İbrahim Efendi yedinden ahz u kabz eyledim, baʻde’l-yevm mûrisim müteveffâ-i mezbûrun terekesinden kalîl ve kesîr, celîl ve hakīr, ma‘lûm ve mechûle müteʻallika âmme-i mîrâs da‘vâsından müvekkile-i mezbûre Âişe Hatun ile vekîl-i mezbûr İbrahim Efendi’nin zimmetlerini bi’l-verâse ibrâ-i âmm-ı kātıʻu’n-nizâ‘la ibrâ ve ıskāt eyledim, vechen mine’l-vücûh ve sebeben mine’l-esbâb husûs-ı mîrâsa müte‘allika katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Ali Usta Ağa b. Mustafa, Mehmed Said Efendi b. Mustafa, es-Seyyid Ahmed Ağa b. Ali, Halil Efendi b. Hamid Efendi, Ömer Efendi b. Mehmed Efendi, Ahmed Efendi b. Mustafa, es-Seyyid Mehmed b. Mustafa, es-Seyyid Ahmed b. es-Seyyid Mehmed, Hüseyin Çelebi b. Mehmed, Ahmed Ağa [b.] Halil Efendi el-Mukayyid.