Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 177 Hüküm no: 130 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırsane bt. Yorgi’nin terekesinden küçük oğlu Nikalo’ya nafaka tayin edilmesi Havâss-ı Refîʻa kazâsına tâbi‘ Litros karyesinde mütemekkine iken bundan akdem hâlike olan Hırsane bt. Yorgi’nin sadrî sagīr oğlu Nikola’nın babası ve tesviye-i umûruna vasî olan işbu râfiʻü’s-sifr Manol v. Makrabet nâm zimmî meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasî olduğum sagīr-i mezbûr Nikola’nın nafaka ve kisveye ihtiyâcı olmağla anası hâlike-i mezbûreden müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbıka idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûr Nikola’ya anası hâlike-i mezbûreden müntakil mâlından beher yevm ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisvesine harc u sarfa ve lede’l-iktizâ istidâneye ve inde’z-zafer mâlından rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâmin min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, Lütfullah Çelebi b. Mehmed, es-Seyyid Mehmed b es-Seyyid Mustafa.