Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 181 Hüküm no: 133 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem Seferi dönüşünde Gerede’de vefât eden Serdengeçti Ağası Seyyid Mesud’un terekesinin vârislerine teslim edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Defterdâr Kara Süleyman Mahallesi sâkinlerinden olup bu sene-i mübârekede Acem seferi avdetinde Gerede kasabasında vefât eden Serdengeçdi Ağası es-Seyyid Mesud b. el-Hâc Mustafa’nın verâseti zevce-i menkûha-i metrûkesi Emetullah Hatun bt. Süleyman ile vâlidesi Fâtıma Hatun bt. Veliyüddin’e ve sulbî sagīr oğlu es-Seyyid Mehmed Emin’e münhasıra ve tashîh-i meseleleri yirmi dört sehmden olup sihâm-ı mezbûreden üç sehmi zevcesi mezbûre Emetullah Hatun’a ve dört sehmi vâlidesi mezbûre Fâtıma Hatun’a ve bâkī on yedi sehmi oğlu sagīr-i mezbûr Mehmed Emin’e isâbeti tahakkukundan sonra sagīr-i mezbûrun ammisi ve tesviye-i umûruna bâ-hüccet-i şer‘iyye vasîsi olan es-Seyyid Mehmed Emin Ağa b. el-mezbûr es-Seyyid el-Hâc Mustafa ile zâtları ta‘rîf-i şer‘î ile mu‘arrefe olan mezbûretân Emetullah ve Fâtıma nâm hatunlar meclis-i şer‘-i şerîf-i enverde müteveffâ-i mezbûrun terekesini veresesine îsâle bâ-hüccet-i şer‘iyye vasiyy-i muhtârı olan işbu râfiʻü’l-kitâb Serdengeçdi Bayrakdârı Mehmed Beşe b. İsmail mahzarında herbiri bi’l-verâse ve bi’l-vesâye ikrâr-ı tâm ve takrîr-i kelâm edip mûrisimiz müteveffâ-i mezbûrun ber-mûceb-i defter-i kādı-yı Gerede merkūm Bayrakdâr Mehmed Beşe’nin makbûzu altmış bir guruş ve hâric ez-defter doksan altı guruş on para ki min-haysü’l-mecmû‘ yüz elli yedi guruş on parayı huzûr-ı şer‘de merkūm Bayrakdâr Mehmed Beşe bize def‘ ve teslîm, biz dahi meblağ-ı mezbûru herbirimiz bi’l-verâse ve bi’l-vesâye yedinden bi-kadri’l-hısas bi’t-tamam ahz u kabz eyledik, meblağ-ı mezbûrdan merkūm Bayrakdâr Mehmed Beşe yedinde ve zimmetinde bir akçe ve bir habbe hakkımız kalmayıp husûs-ı mezbûra müte‘allika âmme-i da‘vâdan merkūm Bayrakdâr Mehmed Beşe’nin zimmetini herbirimiz bi’l-verâse ve ibrâ ve ıskāt edip vechen mine’l-vücûh ve sebeben mine’l-esbâb katʻâ da‘vâ ve nizâ‘ımız yokdur dediklerinde [gıbbe]’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: el-Hâc İsmail [b.] el-Hâc Mehmed, Ahmed Ağa b. Mehmed, Mustafa Ağa b. İbrahim, Ahmed Ağa b. Süleyman, Hüseyin Ağa b. Mustafa.