Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 184 Hüküm no: 136 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem Seferi dönüşünde Gerede’de vefât eden Serdengeçdi Ağası es-Seyyid Mesud’un küçük oğlu Mehmed Emin’e amcasının vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Defterdâr Kara Süleyman Mahallesi sâkinlerinden olup bu sene-i mübârekede Acem seferi avdetinde Gerede kasabasında vefât eden Serdengeçdi Ağası es-Seyyid Mesud b. el-Hâc Mustafa’nın sulbî sagīr oğlu es-Seyyid Mehmed Emin’in tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun ammisi işbu râfiʻü’l-kitâb es-Seyyid Mehmed Emin Ağa b. el-Hâc Mustafa’yı hâkim-i muvakki‘-ı sadr-ı kitâb tûbâ-[lehû ve hüsn-] meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: el-Hâc İsmail b. Mehmed, Ahmed Ağa b. Mehmed, Mustafa Ağa b. İbrahim, Ahmed Ağa, Hüseyin Ağa b. Mustafa, İsmail Ağa b. Mustafa.