Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 189 Hüküm no: 140 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmügülsüm Hatun’un terekesi işlemleri için Seyyid İbrahim’in vasi ve kayyım tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Zeyneb Hatun Mahallesiʼnde sâkine iken bundan akdem vefât eden Şerife Ümmügülsüm Hatun bt. es-Seyyid Mustafa’nın sulbî kebîr oğlu olup vilâyet-i Anadolu’da Kastamonu sancağında Surdive? kasabasında sâkin es-Seyyid Mehmed ile diğer sulbî kebîr oğlu olup diyâr-ı âharda sâkin es-Seyyid Mehmed’in hisse-i irsiyyelerini ahz u kabz, zabt u hıfza kıbel-i şer‘den bir vasî ve kayyım nasb lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan mezbûrân es-Seyyid Mehmed ve diğer es-Seyyid Mehmed’in karındaşları işbu râfiʻü’l-kitâb es-Seyyid İbrahim b. Mustafa’yı hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûrân es-Seyyid Mehmed ve diğer es-Seyyid Mehmed’in hisse-i irsiyyelerini ahz u kabz zabt u hıfza kıbel-i şer‘den vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâ[d]is aşer min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Es-Seyyid Mehmed b. Mustafa, Fahrü’l-kuzât Hüseyin Efendi b. Hüseyin, es-Seyyid Ahmed [b.] es-Seyyid Mehmed, es-Seyyid Mehmed b. es-Seyyid Mustafa, Ahmed Ağa.