Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 191 Hüküm no: 142 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Afrit’in kendisi ile vasisi olduğu oğlu Nikola’ya intikal eden ev, mahzen, dükkan ve bağlardaki miras hisselerini satması Havâss-ı Refîʻa kazâsına tâbi‘ Litros karyesinde mütemekkin iken bundan akdem hâlike olan Kostalinsiye? bt. Dimitri nâm Nasrâniye’nin verâseti zevc-i metrûku Manol v. Afrit ile sadrî sagīr oğulları Nikola ve Yorgo’ya münhasıra olup ba‘dehû mezbûr Yorgo dahi hâlik olup verâseti babası mesfûr Manol nâm zimmîye münhasıra olduğu şer‘an zâhir ve müteʻayyen oldukdan sonra sagīr-i mezbûr Nikola’nın babası ve tesviye-i umûruna vasîsi olan mesfûr Manol nâm zimmî meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîsi olduğum sagīr-i mezbûrun anası hâlike-i mezbûreden müntakil karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzil ve tahtında mahzenin nısfı hâlike-i mesfûrenin ile’l-helâk yedinde mülk olmağla ve nısf-ı âharı dahi kız karındaşı Toli nâm Nasrâniye’nin mülk olup ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât harâbe bir bâb dükkân ve bir mikdâr bağçenin nısfı hâlike-i mesfûrenin ile’l-helâk yedinde mülk olmağın ve nısf-ı âharı dahi kız karındaşı mesfûr Toli nâm Nasrâniye’nin mülk olup ve yine karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât tahmînen üç dönüm mikdârı kürûmî mülk bağ hâlike-i mesfûrenin ile’l-helâk yedinde mülk olmağla ve ber-vech-i muharrer nısf menzil ve tahtında mahzen ve harâbe dükkân ve bir mikdâr bağçe ve kürûmî mülk bağ sekiz sehm i‘tibâr olunup sihâm-ı mezbûreden beş sehmi benim ve üç sehmi sagīr-i mezbûra isâbet etmekle ber-vech-i mübeyyen beş sehm hissemi âhara beyʻ murâd eylediğimde sagīr-i mezbûrun üç sehm hissesi ifrâz mümkün olmadığından mâ‘adâ hâsılı harcına vefâ etmeyip nafaka ve kisveye dahi eşedd-i ihtiyâcı olmağla sâlifü’z-zikr sagīr-i mezbûrun üç sehm hissesi ile benim beş sehm hissem semen-i misliyle âhara beyʻ olunmak sagīr-i mezbûr hakkında her vechile evlâ ve enfa‘ olmağla kıbel-i şer‘den izin verilmek matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver [36b] zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri ber-vech-i muharrer vasiyy-i mezbûrun hissesiyle sagīr-i mezbûrun hissesi ma‘an sûk-ı sultânîde bi’l-müzâyede semen-i misliyle âhara beyʻa ve semeni istirbâh olunmak üzere vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Ahmed Efendi [b.] Mustafa, Mustafa Efendi [b.] Hüseyin, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Hüseyin Çelebi b. Mehmed. Aleksi v. Elfeti, Hıristo v. Terovele, Yanaki v. ( ).