Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 192 Hüküm no: 143 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin vârislerinin miras olarak intikal eden evdeki hisselerini hanımı Ayşe Hatun’a satmaları Husûs-ı âti’l-beyânın mahallinde ketb u tahrîri iltimâs olmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsına tâbi‘ Petnehor nâm karyede sâkine iken bundan akdem vefât eden Ahmed Beşe b. Mehmed’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Âişe Hatun bt. Ramazan ile sulbiye kebîre kızları Zeyneb ve Emetullah’a ve sulbiye sagīre kızı Fâtıma’ya ve li-ebeveyn karındaşı Halil’e münhasıra ve tashîh-i meseleleri yetmiş iki sehmden i‘tibâr olunup sihâm-ı mezbûre[den] dokuz sehmi zevce-i mezbûre Âişe Hatun’a ve on altışar sehmi kızları mezbûrâtdan herbirine ve bâkī on beş sehmi karındaşı mezbûr Halil’e isâbeti tahakkukundan sonra zâtları ta‘rîf-i şer‘î ile muʻarrefe olan mezbûretân Zeyneb ve Emetullah hatunlar ile sagīre-i mezbûreye li-ecli’l-maslaha vasî nasb olunan müteveffâ-i mezbûrun karındaşı mezbûr Halil meclis-i ma‘kūd-ı mezkûrda işbu râfiʻatü’l-kitâb mezbûre Âişe Hatun mahzarında herbiri ikrâr ve takrîr-i kelâm edip mûrisimiz müteveffâ-i mezbûrun ile’l-vefât mülkü ve hakkı idiği müsbet olup karye-i mezbûrede bir tarafdan Ahmed Beşe menzili ve bir tarafdan Uzun Mehmed menzili ve bir tarafdan baʻzan tarla ve baʻzan Mehmed çayırı ile mahdûd iki bâb fevkānî oda ve bir [de]hlîz ve sundurma ve tahtında ahır ve kenîf ve samanhâne ve bağçeyi muhtevî menzilden tereke-i vâfiyesi düyûn-ı müsbetesini edâ etmemekle verese-i kibâr hisselerini âhara beyʻ murâd edip sagīre-i mezbûrenin on altı sehm hissesi ifrâz mümkün olmayıp ve sagīre-i mezbûre nafaka ve kisve-bahâya dahi eşedd-i ihtiyâcı olmağla sagīre-i mezbûrenin hisseleri ile verese-i kibârın hisseleri bi’l-izni’ş-şer‘î sûk-ı sultânîde müzâyede olunup ragabât-ı nâs bi’l-külliye münkatıʻa oldukdan sonra mezbûre Âişe Hatun üzerinde yüz elli guruş karâr edip ziyâde ile tâlib-i âharı zuhûr etmeyip meblağ-ı mezbûr menzil-i mezbûrun el-yevm semen-i misli idiğini zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile semen-i misli olan meblağ-ı mezbûr yüz elli guruşa herbirimiz bi’l-verâse ve bi’l-vesâye târîh-i kitâbdan bir sene mukaddem beyʻ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl edip semen olan meblağ-ı mezbûr yüz elli guruşu mezbûr Âişe Hatun yedinden herbirimiz bi-kadri’l-hısas ahz u kabz eyledik, baʻde’l-yevm menzil-i mahdûd-ı mezkûr mezbûr Âişe Hatun’un mülk-i müşterâsı olmuşdur, keyfe mâ teşâ ve tahtâr mutasarrıfe olsun dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an irsâl olunan Hoka Ahmed b. Mehmed ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Es-Seyyid Mehmed Çelebi [b.] es-Seyyid Mustafa, Osman Efendi el-İmâm, Müezzin Mollâ Ali, Hüseyin Beşe b. Mehmed, Abdullah b. Ali.