Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 199 Hüküm no: 148 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çakıcı tâifesinden İbrahim Ağa’nın evini ortak olarak Hatice Hatun , Fâtıma Hatun ve Ayşe Hatun’a satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Çömlekçiler sûkunda Çakıcı tâifesinden İbrahim Ağa b. el-Hâc Abdurrahman meclis-i [şer‘-i] şerîf-i enverde işbu râfiʻâtü’l-kitâb Hadice Hatun bt. Abdullah’ın dâmâdı ve kızı Fâtıma Hatun bt. Bahri Yusuf Bey’in zevci olup ve taraflarından husûs-ı âti’l-beyânı tasdîka vekîl-i sâbitü’l-vekâlesi olan Mehmed Efendi b. Mehmed ve Âişe Hatun bt. el-mezbûr Yusuf Bey’in zevci ve tarafından kezâlik zikri âtî husûsu tasdîka vekîl-i sâbitü’l-vekâlesi olan İbrahim Ağa b. Mehmed mahzarlarında ikrâr-ı tâm ve takrîr-i kelâm edip yedimde olan mübâya‘a hücceti mantûkunca medîne-i mezbûrede Musa Çavuş Mahallesiʼnde vâki‘ bir tarafdan baʻzan İmâm Abdullah Efendi ve baʻzan Mukāta‘acızâde menzilleri ve bir tarafdan tarîk-i hâs ile mahdûd hâriciyyesinde iki bâb fevkānî oda ve bir köşk ve zât-ı eşcâr-ı müsmire ve gayr-ı müsmire bağçe ve dâhiliyesinde üç bâb fevkānî oda ve bir havuz ve bir matbah ve üç su kuyusu ve kenîf ve zât-ı eşcâr-ı müsmire ve gayr-ı müsmireli bağçeyi muhtevî mülk menzilimi cemî‘ tevâbiʻ ve levâhıkıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile sekiz yüz beş guruşa müvekkilât-ı mezbûrât Hadice ve Fâtıma ve Âişe nâm hatunlara ale’l-iştirâki’s-seviyy beyʻ ve temlîk ve teslîm eylediğimde ânlar dahi ber-vech-i muharrer iştirâ ve temellük ve tesellüm ve kabûl ve kabz eylediklerinden sonra semeni olan meblağ-ı mezbûr sekiz yüz beş guruşdan altı yüz elli beş guruşu bundan akdem bi-tarîkı’l-havâle deynim olan meblağ-ı mezbûr altı yüz elli beş guruşa takās eylediğimde müvekkilât-ı mezbûrât Hadice ve Fâtıma ve Âişe nâm hatunlar dahi mukāssa ve kabûl edip semen-i bâkī yüz elli guruşu müvekkilât-ı mezbûrân yedlerinden bi’t-tamam ahz u kabz eyledim, baʻde’l-yevm menzil-i mahdûd-ı mezkûr müvekkilât-ı mezbûrân Hadice ve Fâtıma ve Âişe nâm hatunların ale’l-iştirâki’s-seviyy mülk-i müşterâsı ve hakk-ı sırfları olmuşdur, keyfe mâ teşâʼât ve tahtârât mutasarrıflar olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, Mehmed Said Efendi b. Mustafa, es-Seyyid Mustafa Efendi [b.] es-Seyyid Ahmed, es-Seyyid Mehmed [b.] es-Seyyid Mustafa.