Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 197 Hüküm no: 147 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fotini bt. Dimitri’nin vârisleri arasındaki tereke anlaşmazlığının sulhle sonuçlanması Husûs-ı âti’l-beyânın mahallinde ketb u tahrîri için savb-ı enverden me’zûn[en] irsâl olunan Ahmed Efendi b. Mustafa Efendi ol dahi Havâss-ı Refîʻa kazâsına tâbi‘ Litros? karyesinde mütemekkin Kostantin v. İskerlet nâm zimmînin menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘ ettikde karye-i mezbûrede mütemekkine iken bundan akdem hâlike olan Fotini bt. Dimitri nâm Nasrâniye’nin verâseti zevci mesfûr Kostantin nâm zimmî ile sadrî kebîr oğlu Likori v. Kostantin ve sadriye kebîre kızı Krişti bt. mesfûr Kostantin’e münhasıra olduğu şer‘an zâhir ve müteʻayyen oldukdan sonra mesfûr Likori nâm zimmî şahsı ta‘rîf-i şer‘î ile muʻarrefe olan mesfûr Krişti nâm Nasrâniye meclis-i ma‘kūd-ı mezkûrda babası işbu râfiʻü’s-sifr mesfûr Kostantin nâm zimmî muvâcehesinde bi’l-verâse ikrâr ve takrîr-i kelâm edip işbu yedimizde ber-mûceb-i defter-i müfredât anamız hâlike-i mesfûreden müntakil terekesinden mecmû‘u beş yüz yetmiş iki guruş kıymetli bir sim tâbe ve yirmi miskāl altın bilezik ve bir yüzük ve altın yaldız sorguç ve altın gerdanlık ve bir inci kuşak ve bir sim kuşak ve bir samur kürk ve bir yeşil hatâî kürk ve bir sim düğmeli hatâî kaftan ma‘a anteri ve bir hatâî kaftan ma‘a anteri ve bir çift altın küpe ve bir kırmızı çuka ferâce ve bir sırmalı çekme ve bir makrame ve bir dîbâ ve üç çuka serpûş ve altı gömlek ma‘a don ve tersiz ve ahar terli peşkir ve üç üstlük ve üç yorgan ve üç döşek ve altı minder ve on beledî yasdık ve bir seccâde ve üç Yanbolu kebesi ve bir havlu ma‘a ihrâm ve sagīr ma‘a kebîr kazgan ve iki güğüm ve beş tencere ma‘a kapak ve bir leğen ma‘a ibrik ve yirmi sahan ma‘a lenger ve üç tâbe ma‘a tas ve beş kebîr fıçı ve bir lazare ve beş çapa ma‘a bel ve iki sandık ve iki aynamı babamız mesfûr Kostantin nâm zimmî ketm ve ihfâ etmekle eşyâ-yı muharrere-i mezkûreden herbirimize isâbet eden hisse-i irsiyyemizi babamız mesfûr Kostantin nâm zimmîden da‘vâ edip ve kezâlik anamız hâlike-i mezbûrenin büyük anası olup kendisinden sonra hâlike olan Hıristine bt. Yuvan nâm zimmînin verâseti bizlere münhasıra olmağla tereke-i hâlike-i mezbûreden yine babamız Kostantin nâm zimmînin ketb [ve] ihfâ eylediği mecmû‘ yetmiş guruş kıymetli bir sim iğne ve bir çift sim bıçak ve bir sim kuşak ve on sekiz sahan ayaklı ve Terkos nâhiyesinde vâki‘ Ayazma karyesinde ma‘lûmü’l-hudûd menzil arsası ve kürûmî mülk bağ arsası yine babamız mesfûr Kostantin’den iddiʻâ eylediğimizde ve yine sâlifü’z-zikr Avas karyesinde vâki‘ bir tarafdan Hıristodoli mülkü ve iki tarafdan mezbûrân Ligori ve Krişti mülkü ve bir tarafdan tarîk-i âm ile [mahdûd] bir bâb fevkānî oda ve dehlîz ve tahtında fırın ve zât-ı eşcâr-ı müsmire ve havluyu müştemil mülk menzili fuzûlî zabt eder deyü babamız mesfûr Kostantin nâm zimmîden bi’l-verâse taleb ve da‘vâ eylediğimizde ol dahi cevâbında mârru’z-zikr Avas karyesinde vâki‘ menzil-i mahdûd-ı mezkûru zevcem hâlike-i mezbûrenin anası Hıristine nâm Nasrâniye’nin mülkü olmağla târîh-i kitâbdan otuz sene mukaddem hüccet-i şer‘iyye ile hayâtında yedinden iştirâ ve ol vechile menzil-i mezkûr benim mülk-i müşterâmdır deyü bizleri [38a] def‘ ve eşyâ-i muharrere-i mezkûreyi ve sâlifü’z-zikr menzil arsasını ve bağ arsasını bi’l-külliye inkâr etmekle bu vechile beynimizde münâzaʻât-ı kesîre ve muhâsamât-ı şedîde vâkıʻa olmağla el-hâletü hâzihî muslihûn tavassut edip babamız mesfûr Kostantin nâm zimmî ile bizi elli guruş üzerine inşâ-i akd-i sulh eylediklerinde biz dahi ber-vech-i muharrer sulh-ı mezbûru bi’l-verâse baʻde’l-kabûl ve bedel-i sulh olan meblağ-ı mezbûr elli guruşu babamız mesfûr Kostantin nâm zimmî yedinden herbirimiz bi’l-verâse bi-kadri’l-hısas bi’t-tamam ahz u kabz eyledik, baʻde’l-yevm eşyâ-i muharrere-i mezkûre ve menzil arsasına ve bağ arsasına ve mârru’z-zikr menzil-i mahdûd-ı mezkûre anamız hâlike-i mesfûre Fotini nâm Nasrâniye’nin ve büyük anamız hâlike-i mezbûrenin terekelerinden kalîl ü kesîr celîl ü hakīr ma‘lûm ve mechûle müte‘allika âmme-i mîrâs da‘vâsından babamız mesfûr Kostantin nâm zimmînin zimmetini herbirimiz bi’l-verâse ibrâ-i kātıʻu’n-nizâ‘la ibrâ ve ıskāt eylediğimizde ol dahi bedel-i sulh deyü bize medfû‘u olan meblağ-ı mezbûr elli guruş mütâlebesinden bizim zimmetimizi ibrâ ve ıskāt edip menzil-i mezkûra ve sâire husûs-ı mîrâsa müte‘allik vechin mine’l-vücûh ve sebeben mine’l-esbâb babamız mesfûr Kostantin nâm zimmî ile katʻâ da‘vâ nizâ‘ımız yokdur dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘den Çukadâr Ahmed Ağa b. Hamdi ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-Şevvâl sene 1158. Şuhûdü’l-hâl: Bostanî Abdullah b. Ali, Hüseyin Çelebi b. Mehmed, Mehmed Çelebi b. Abdullah, Musa Bey b. Ömer ve gayruhum. Papa Hıristo v. Vasil, Nikola v. Panayot, Papa Yani v. Petro, Yanaki v. Nikola, Dimitri v. Zafiri.