Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 200 Hüküm no: 150 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Abdullah’ın yed-i eminde olan terekesini vârisi Rukiye Hanım’ın teslim alması Havâss-ı Refîʻa muzâfâtından Çekmece-i Kebîre nâhiyesine tâbi‘ Bojdar karyesinde sâkine iken bundan akdem vefât eden Emine Hatun bt. Abdullah’ın min-ciheti’l-verâsesi olduğu şuhûd-ı udûlden olup lede’t-tezkiye şehâdetleri makbûle olan mahmiye-i İstanbul’da Bali Paşa Mahallesiʼnde sâkin Mustafa Efendi b. Ahmed ve Mustafa Çelebi b. Veliyüddin nâm kimesneler şehâdetleriyle muvâcehe-i hasm-ı şer‘de sâbit ve verâsetine hükmolunan Rukiye Hanım bt. Kıyasî Ahmed Efendi b. Mustafa tarafından zikri âtî husûsda vekîl olduğu zât-ı mezbûreyi bi’l-ma‘rifeti’ş-şer‘iyye ârifân şâhidân-ı mezbûrân Mustafa Efendi ve Mustafa Çelebi nâm kimesneler şehâdetleriyle vekâleti sâbit olan fahrü’l-kuzât Osman Efendi b. Osman meclis-i şer‘-i şerîf-i enverde karye-i mezbûrenin beytülmâlını kabza meʼmûr olan işbu râfiʻü’l-kitâb fahrü’l-akrân Salih Ağa b. Mehmed ve tereke-i müteveffât-ı mezbûre Eyüb sûkuna araba ile hîn-i naklinde toprakda bulunan beytülmâl Hazret-i Eyüb Vakf-ı şerîfine hâsıl kaydolmuşdur deyü vakf-ı şerîf tarafından emîn-i beytülmâl nâzırı işbu hâzır bi’l-meclis es-Seyyid Ahmed Ağa b. es-Seyyid Mehmed mahzarlarında bi’l-vekâle ikrâr-ı tâm ve takrîr-i kelâm edip müteveffât-ı mezbûrenin terekesi tahrîr ve ba‘de ihrâci’l-mesârif ber-mûceb-i defter-i kassâm yed-i emînde hıfz olunan bâkī sekiz bin sekiz yüz kırk yedi akçe müvekkile-i mezbûrenin hisse-i irsiyyesi olmağla emîn-i merkūm Salih Ağa ile merkūm es-Seyyid Ahmed Ağa yedlerinden vekâlet-i mahkiyem hasebiyle bi’t-tamam ve’l-kemâl ahz u kabz eyledim, baʻde’l-yevm müteveffât-ı mezbûrenin terekesinden bir akçe ve bir habbe bâkī kalmayıp husûs-ı mezbûra müte‘allika âmme-i da‘vâdan emîn-i merkūm Salih Ağa ile mezbûr es-Seyyid Ahmed Ağa’nın zimmetlerini bi’l-vekâle ibrâ ve ıskāt edip vechen mine’l-vücûh ve [sebeben mine’l-e]sbâb katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Mustafa Efendi [b.] Hüseyin, Ahmed Efendi b. Mustafa, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Ahmed Ağa [b.] Hamdi Mehmed, Halil Efendi el-Mukayyid.