Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 201 Hüküm no: 151 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un vefât eden kocası Mustafa Çelebi’deki mehir alacağını terekesinden almak istemesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Musa Çavuş Mahallesiʼnde sâkin iken bundan akdem vefât eden Mustafa Çelebi b. Osman’ın zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Sâliha Hatun bt. İbrahim meclis-i şer‘-i şerîf-i enverde müteveffâ-i mezbûrun li-ümmin kız karındaşları olup tereke-i müteveffâ-i mezbûra bi’l-verâse vâzıʻatü’l-yed olan Hafize Hatun bt. İbrahim’in zevci ve tarafından husûs-ı âti’l-beyânda müseccel vekîl-i şer‘îsi olan Hamza Efendi b. Hüseyin ve Fâtıma Hatun bt. el-mezbûr İbrahim’in zevci ve tarafından husûs-ı âti’l-beyânda tasdîka vekîl-i sâbitü’l-vekâlesi Abdülgafur Efendi b. ( ) mahzarlarında üzerlerine da‘vâ ve takrîr-i kelâm edip zevcim müteveffâ-i mezbûr Mustafa Çelebi b. Osman b. Abdullah zimmetinde mütekarrer ve ma‘kūdün-aleyh altı bin akçe mehr-i müeccel hakkım olup hatta müteveffâ-i mezbûr hâl-i hayâtında ve kemâl-i akl [u] sıhhatinde meblağ-ı mezbûr ol kadar akçe zimmetinde bana vâcibü’l-edâ mehr-i müeccel deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müddeiyye-i mezbûreden müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den olup medîne-i mezbûrede Baba Haydar Nakşibendî Mahallesiʼnde sâkin Ömer Odabaşı b. Ali ve tâife-i nisâdan Ümmügülsüm Hatun bt. Mustafa ve Râbia Hatun bt. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘iye-i mezbûre Sâliha nâm hatunun zevci müteveffâ-i mezbûr Mustafa Çelebi b. Osman b. Abdullah zimmetinde mütekarrer ve ma‘kūdün-aleyh altı bin akçe mehr-i müeccel hakkı olup hatta müteveffâ-i mezbûr hâl-i hayâtında ve kemâl-i akl [u] sıhhatinde meblağ-ı mezbûr ol kadar akçe zevcesi müdde‘iye-i mezbûre Sâliha Hatun’a zimmetinde vâcibü’l-edâ mehr-i müeccel deyni olduğunu huzûrumuzda kirâren ve mirâren ikrâr ve ânlar işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem sene semân ve hamsîn ve mi’e ve elf. Şuhûdü’l-hâl: Es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Ahmed Ağa [b.] Hamdi Mehmed, Halil Efendi el-Mukayyid, Hüseyin Çelebi b. Mehmed, Musa Bey.