Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 222 Hüküm no: 171 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefâtıyla küçük çocuklarına vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkine iken bundan akdem vefât eden Hadice Hatun bt. Yusuf’un sadrî sagīr oğlu Mehmed Emin ile sadriye sagīre kızı Emine’nin tesviye-i emirlerine kıbel-i şer‘den bir vasî nasbı lâzım ve mühim olmağın sagīrân-ı mezbûrânın babaları olup mahmûdü’l-hâl idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’l-kitâb Yusuf Çelebi b. Mehmed’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrânın tesviye-i emirlerine vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilkaʻde sene semân ve hamsîn ve mi’e ve elf. Şuhûdü’l-hâl: İsmail Bey [b.] Rüstem Ağa, İbrahim Çelebi [b.] İvaz, İsmail Ağa [b.] Ahmed, Halil Çelebi b. İbrahim, es-Seyyid Ahmed [b.] es-Seyyid Mehmed.