Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 222 Hüküm no: 170 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Kerime Hatun’un Safranbolu’daki vârisleri için el-Hâc Süleyman’ın vasi ve kayyım tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Zal Paşa Mahallesiʼnde sâkine iken bundan akdem vefât eden Şerife Kerime Hatun bt. İbrahim’in vilâyet-i Anadolu’da Zağferanbolu kazâsına tâbi‘ Gomar? karyesinde sâkine vâlidesi Şerife Fâtıma Hatun ile li-ebeveyn er karındaşı es-Seyyid Mehmed ve li-ebeveyn kız karındaşları Şerife Âişe ve Şerife Rahime nâm hatunların hisse-i irsiyyelerini ahz u kabz ve zabt u hıfza kıbel-i şer‘den bir vasî ve kayyım nasbı lâzım ve mühim olmağla emânet ile ma‘rûf ve diyânet ile mevsûf herbir vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’l-kitâb el-Hâc Süleyman b. Ali’yi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûrâtın hisse-i irsiyyelerini ahz u kabz zabt u hıfza kıbel-i şer‘den vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Ali Çelebi b. Abdullah, Mehmed Efendi b. Hasan, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi b. İbrahim, Hüseyin Çelebi b. Mehmed.