Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 224 Hüküm no: 173 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Dimitri’nin ölümüyle küçük oğlu Yanaki’ye intikal eden ev ve dükkanın vasisi tarafından Kostantin ve Foti’ye satılması Havâss-ı Refîʻa kazâsına tâbi‘ Burgos karyesinde mütemekkin iken bundan akdem hâlik olan Papa Dimitri v. Tarandafil’in sulbî sagīr oğlu Yanaki zimmînin tesviye-i umûruna bâ-hüccet-i şer‘iyye mansûb vasîsi olan Yorgo v. Tarandafil meclis-i şer‘-i şerîf-i enverde işbu râfiʻayü’s-sifr Kostantin ve Foti veledey Toroş nâm zimmîler muvâcehelerinde bi’l-vesâye ikrâr-ı tâm ve takrîr-i kelâm edip vasîsi olduğum sagīr-i mezbûrun babası hâlik-i mezbûr Papa Dimitri nâm zimmîden müntakil mülk-i mevrûsu olup karye-i mezbûrede vâki‘ bir tarafdan Bogana zimmî menzili ve bir tarafdan Pençoğulları menzili ve bir tarafdan Kara Nikola menzili ve bir tarafdan tarîk-i âm ile mahdûd iki bâb fevkānî oda ve altında ahır ve sundurma ve ittisâlinde bir bâb dükkânı âhar[a] beyʻa kıbel-i şer‘den bâ-hüccet-i şer‘iyye me’zûn olduğuma binâen menzil-i mahdûd-ı mezkûr ile ittisâlinde vâki‘ dükkânı sûk-ı sultânîde müddet-i medîde müzâyede olunup ragabât-ı nâs bi’l-külliye münkatıʻa oldukdan sonra mezbûrân Kostantin ve Foti nâm zimmîler üzerlerinde dört yüz guruşda karâr edip ziyâde ile tâlib-i âhar zuhûr etmeyip ve meblağ-ı mezbûr menzil-i mezkûr ile dükkân-ı merkūmun el-yevm semen-i misli olduğunu zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile semen-i misli olan meblağ-ı mezbûr dört yüz guruşa sâlifü’z-zikr menzil ile dükkânı mezbûrân Kostantin ve Foti nâm zimmîlere ale’l-iştirâki’s-seviyy bi’l-vesâye beyʻ ve temlîk ve teslîm eylediğimde ânlar dahi ber-vech-i muharrer iştirâ ve temellük ve tesellüm ve kabûl ve kabz eylediklerinden sonra semen-i misli olan meblağ-ı mezbûr dört yüz guruşu mezbûrân Kostantin ve Foti nâm zimmîlerin yedlerinden bi’l-vesâye ahz u kabz eyledim, baʻde’l-yevm menzil-i mahdûd-ı mezkûr ile ittisâlinde vâki‘ dükkânı mezbûrân Kostantin ve Foti nâm zimmîlerin ale’l-iştirâki’s-seviyy mülk-i müşterâları ve hakk-ı sırfları olmuşdur, mutasarrıfân olsunlar dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Zilkaʻde sene semân ve hamsîn ve mi’e ve elf. Şuhûdü’l-hâl: Mehmed Çavuş Ağa, Mollâ Ali b. Mehmed, Mustafa Beşe [b.] Abdülkerim, es-Seyyid Mehmed [b.] es-Seyyid Mustafa, Halil Efendi el-Mukayyid, es-Seyyid Ahmed [b.] es-Seyyid Mehmed. Toroş v. Kosta, Hürmüz v. Tardoş, Manol v. Andre, Kosta v. Hıristo, İskerlet v. Lanbo, Andre v. Zoli.