Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 225 Hüküm no: 174 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Yuvan’ın ölümüyle küçük kızı Sanoye ile doğacak çocuğuna hanımı Malye bt. Zati’nin vasi tayin edilmesi Havâss-ı Refîʻa kazâsına tâbi‘ Karfa karyesinde mütemekkin iken bundan akdem hâlik olan Yani v. Yuvan’ın sulbiye sagīre kızı Sanoye’nin tesviye-i umûruna ve zevcesi Malye bt. Zati nâm Nasrâniye’nin müstebîn-i hamlin hisse-i mevkūfesini ahz u kabz zabt u hıfza kıbel-i şer‘den bir vasî nasbı lâzım ve mühim olmağın emânet ile ma‘rûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīre-i mezbûrenin anası işbu râfiʻatü’s-sifr mesfûre Malye’yi hâkim-i muvakki‘-ı sadr-ı kitâb [45a] tûbâ-lehû ve hüsnü-meâb efendi hazretleri sagīre-i mezbûrenin tesviye-i umûruna ve haml-i mezbûrun hisse-i mevkūfesini ahz u kabz zabt u hıfza kıbel-i şer‘den vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Ahmed Efendi b. Mustafa, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Ahmed Ağa [b.] Hamdi Mehmed, Halil Çelebi b. İbrahim, Hüseyin Çelebi b. Mehmed. Yani v. Tanaş, Rali v. Nikola, Yorgo v. Ligori, Kosta v. İskerlet.