Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 228 Hüküm no: 178 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Çelebi’nin vasileri olduğu küçük çocukları Mehmed Emin ve Emine’ye annelerinden intikal eden pereme yerindeki hisselerini satmasına izin verilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkine iken bundan akdem vefât eden Hadice Hatun bt. Yusuf’un sadrî sagīr oğlu Mehmed Emin ile sadriye sagīre kızı Emine’nin babaları ve tesviye-i emirlerine vasîleri olan işbu bâ‘isü’l-kitâb Yusuf Çelebi b. Ahmed meclis-i şer‘-i şerîf-i enverde takrîr-i kelâm ve tâʻbir ani’l-merâm edip mahrûse-i Galata hısnı hâricinde vâki‘ merhûm ( ) Mehmed Paşa Evkāfı’ndan pereme yerine icâre-i muʻaccele ve müeccele ile vasîleri olduğum sagīrân-ı mezbûrânın vâlideleri müteveffât-ı mezbûre Hadice Hatun’un ile’l-vefât taht-ı tasarrufunda olan nısf hisse kānûn üzere sadriye kebîre kızı Fâtıma ile sagīrân-ı mezbûrân Mehmed Emin ve Emine’ye intikāl-ı âdî ile intikāl etmeğin sâlifü’z-zikr pereme yerinde olan hissesini mezbûre Fâtıma âhara ferağ murâd edip sagīrân-ı mezbûrânın hisseleri harâbe müşrif olup hâsılı harcına vefâ etmediğinden mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın hisseleri sûk-ı sultânîde baʻde’l-müzâyede ve inkıtâʻi’r-rağbe bedel-i misli ve ma‘rifet-i mütevellî ile âhara ferağ ve bedeli istirbâh olunmak sagīrân-ı mezbûrân haklarında her vechile enfa‘ ve evlâ olmağın sagīrân-ı mezbûrânın pereme yerinde olan hisselerini âhara ferâga kıbel-i şer‘den izin verilmek matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrân[ın] pereme yerinde olan hisselerini baʻde’l-müzâyede ve inkıtâʻi’r-rağbe bedel-i misli ve ma‘rifet-i mütevellî âhara ferağ ve bedeli istirbâh olunmak üzere vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-ışrîn min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: İsmail Bey b. Rüstem Ağa, İbrahim Çelebi b. İvaz, İsmail Ağa b. Ahmed, Halil Ağa b. İbrahim, es-Seyyid Mehmed Çelebi [b.] es-Seyyid Mustafa, es-Seyyid Ahmed Çelebi [b.] es-Seyyid Mehmed.