Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 227 Hüküm no: 177 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin evini istiğlal yoluyla vefât eden Mustafa Ağa’nın küçük oğlu Mehmed Emin’e satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Servi Mahallesiʼnde sâkin İbrahim Çelebi b. Mehmed meclis-i şer‘-i şerîf-i enverde bundan akdem vefât eden Mustafa Ağa’nın sulbî sagīr oğlu Mehmed Emin’in bâ-hüccet-i şer‘iyye vasîsi olan işbu râfiʻü’l-kitâb İbrahim Ağa b. Selim Ağa mahzarında ikrâr-ı tâm ve takrîr-i kelâm edip yedimde mülküm olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât büyût-ı adîdeyi muhtevî mülk menzilimi cemî‘ tevâbiʻ ve levâhıkıyla vasiyy-i merkūm İbrahim Ağa’ya bi-tarîkı’l-istiğlâl yüz guruşa beyʻ ve teslîm eylediğimde ol dahi ber-vech-i muharrer sagīr-i mezbûrun mâlıyla iştirâ ve tesellüm ve kabûl edip meblağ-ı mezbûr yüz guruşu vasiyy-i merkūm İbrahim Ağa yedinden tamamen ahz u kabz eylediğimden sonra vasiyy-i merkūm İbrahim Ağa menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î beher şehr ellişer para ücret ile işbu târîh-i vesîkadan iki sene tamamına değin bana îcâr ve teslîm, ben dahi vech-i muharrer üzere istîcâr ve kabûl eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi [b.] Mustafa, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi b. İbrahim, Hüseyin Çelebi b. Mehmed.