Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 230 Hüküm no: 180 Orijinal metin no: [45M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin vârislerinin terekeden hisselerini alarak birbirlerinin zimmetlerini ibra etmeleri Havâss-ı Refîʻa kazâsı muzâfâtından kasaba-i Hasköy’de Südlüce’de Mahmud Ağa Mahallesiʼnde sâkin iken bundan akdem vefât eden Mekükî Ahmed Efendi b. el-Hâc Mehmed’in verâseti zevce-i menkûha-i metrûkesi Âişe Hatun bt. el-Hâc Mehmed ile sulbî kebîr oğulları Halil Efendi ve Mollâ Mehmed ve sulbiye kebîre kızı Hadice’ye münhasıra olduğu şer‘an zâhir ve müteʻayyen oldukdan sonra kendi tarafından asâleten ve zâtı ta‘rîf-i şer‘î ile mu‘arrefe olan mezbûre Âişe Hatun tarafından husûs-ı âti’l-beyânda vekîl-i sâbitü’l-vekâlesi olan merkūm Mollâ Mehmed vekâleten ve kezâlik zâtı ta‘rîf-i şer‘î ile mu‘arrefe olan mezbûre Hadice Hatun’un zevci ve tarafından husûs-ı âti’l-beyânda vekîl-i sâbitü’l-vekâlesi olan el-Hâc Mehmed b. ( ) meclis-i şer‘-i şerîf-i enverde müteveffâ-i mezbûrun terekesine bi’l-verâse vâzıʻu’l-yed olan işbu râfiʻü’l-kitâb merkūm Halil Efendi mahzarında herbiri bi’l-asâle ve’l-vekâle ikrâr-ı tâm ve takrîr-i kelâm edip mûrisimiz müteveffâ-i mezbûrun terekesini beynlerimizde fürûht eyleyip terekesi semeni yüz kırk guruşa bâliğ olmağla meblağ-ı mezbûrdan herbirimizin hissesini beynlerimizde iktisâm edip herbirimiz bi-kadri’l-hısas merkūm Halil Efendi yedinden bi’l-asâle ve’l-vekâle bi’t-tamam ve’l-kemâl ahz u kabz eyledik, baʻde’l-yevm mûrisimiz müteveffâ-i mezbûrun mahâll-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzilinden mâ‘adâ müteveffâ-i mezbûrun terekesine müte‘allika âmme-i mîrâs da‘vâsından merkūm Halil Efendi’nin zimmetini herbirimiz bi’l-asâle ve’l-vekâle ibrâ-i âmm-ı kātıʻu’n-nizâ‘la ibrâ ve ıskāt eyledikde ol dahi kezâlik bizim zimmetimizi ibrâ ve ıskāt edip vechen mine’l-vücûh ve sebeben mine’l-esbâb husûs-ı mîrâsa müte‘allika katʻâ da‘vâ ve nizâ‘ımız yokdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Mollâ Ahmed b. Hamdi, Arnavud Mehmed, Ahmed Efendi b. Mustafa, Mustafa Efendi [b.] Hüseyin, es-Seyyid Mehmed [b.] es-Seyyid Mustafa, Mehmed Said Efendi b. İbrahim, Hüseyin Çelebi b. Mehmed, es-Seyyid Ahmed [b.] es-Seyyid Mehmed.