Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 231 Hüküm no: 181 Orijinal metin no: [45M/a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın vârisleri olan hanımı Fâtıma Hatun ile oğlu Ali’nin kendilerine miras kalan evi Ahmed Ağa’ya satmaları Dergâh-ı âlî -dâme mahfûfen bi’l-maʻâlî- yeniçerilerinin ellinci bölük odasında sâbıkā çorbacı mütekāʻidlerinden olup Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesinde sâkin iken bundan akdem vefât eden Mustafa Ağa b. Hasan’ın verâseti zevce-i menkûha-i metrûkesi Fâtıma Hatun bt. Abdullah ile sulbî sagīr oğlu Ali’ye münhasıra ve tashîh-i meselesi sekiz sehmden i‘tibâr olunup sihâm-ı mezbûreden bir sehmi zevcesi mezbûre Fâtıma Hatun’a ve yedi sehmi sagīr-i mezbûr Ali’ye isâbeti tahakkukundan sonra sagīr-i mezbûrun vâlidesi ve tesviye-i umûruna bâ-hüccet-i şer‘iyye mansûb vasiyyesi olan mezbûre Fâtıma Hatun tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân [45m/b] Ali Ağa b. Abdullah ve diğer Ali b. İbrahim nâm kimesneler şehâdetleriyle vekâleti sâbit olan sagīr-i mezbûrun ammizâdesi Mustafa Ağa b. İbrahim nâm kimesne meclis-i şer‘-i şerîf-i enverde karye-i mezbûre sâkinlerinden işbu râfiʻü’l-kitâb Ahmed Ağa b. Mustafa mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Fâtıma Hatun vasiyyesi olduğu oğlu sagīr-i mezbûrun babası müteveffâ-i mezbûr Mustafa Ağa’nın ile’l-vefât yedinde mülkü ve hakkı idiği müsbet olup karye-i mezbûrede vâki‘ bir tarafdan el-Hâc Hüseyin Ağa menzili ve etrâf-ı selâsesi tarîk-i âm ile mahdûd hâriciyyesinde bir bâb fevkānî oda ve öküz ahırı ve sundurma ve bir at ahırı ve otluk havlusu ve bir su kuyusu ve dâhiliyesinde iki bâb fevkānî oda ve cihânnümâ ve iki sofa ve bir gasilhâne ve bir fırın ve altında ahır ve anbar ve bağçe ve kenîf ve havluyu muhtevî çiftlik tâʻbir olunur mülk menzilden tashîh-i merkūm üzere müvekkilem mezbûre Fâtıma Hatun bir sehm hissesini âhara beyʻ murâd eylediğinde sagīr-i mezbûrun yedi sehm hissesi müddet-i medîd harâbe müşrif olup hâsılı harcına vefâ etmediğinden mâ‘adâ sagīr-i mezbûrun ta‘mîr ve termîme dahi mâlı olmayıp ve bekāsı dahi müteʻassir olmağla çiftlik tâʻbir olunur menzilden müvekkilem mezbûrenin bir sehm hissesiyle sagīr-i mezbûrun yedi sehm hissesi ma‘an sûk-ı sultânîde baʻde’l-müzâyede ve inkıtâʻi’r-rağbe semen-i misli ile âhara beyʻa kıbel-i şer‘den bâ-hüccet-i şer‘iyye me’zûn olunduğuna binâen zikri mürûr eden çiftlik tâʻbir olunur menzil-i mahdûd-ı mezkûr sûk-ı sultânîde müddet-i medîd müzâyede olunup ragabât-ı nâs bi’l-külliye münkatıʻa oldukdan sonra mezbûr Ahmed Ağa üzerinde altı yüz guruşda karâr edip ziyâde ile tâlib-i âhar zuhûr etmeyip ve meblağ-ı mezbûr çiftlik tâʻbir olunur menzil-i mahdûd-ı mezkûrun el-yevm semen-i misli olduğunu zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î semen-i misli olan meblağ-ı mezbûr altı yüz guruşa merkūm Ahmed Ağa’ya bi’l-vekâle beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen-i misli olan meblağ-ı mezbûr altı yüz guruşu merkūm Ahmed Ağa yedinden bi’l-vekâle ahz u kabz eyledim, baʻde’l-yevm çiftlik tâʻbir olunur menzil-i mahdûd-ı mezkûr merkūm Ahmed Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Mehmed Efendi [b.] Ali el-İmâm der-karye-i mezbûr, Mustafa Beşe [b.] Memiş, Sipahoğlu Mehmed, Müezzin Mollâ Mustafa, Mustafa tâbi‘-i Ahmed Ağa, Mustafa Beşe, Ömer Beşe, Naʻlbend Kör Hüseyin, Ahmed Ağa Voyvoda.