Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 232 Hüküm no: 182 Orijinal metin no: [45M/b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’a vasisi olduğu küçük oğlu Ali’ye babasından intikal eden evdeki hissesini satmaya izin verilmesi Dergâh-ı âlî -dâme mahfûfen bi’l-maʻâlî- yeniçerilerinin ellinci bölük odasında sâbıkā çorbacı mütekāʻidlerinden olup Havâss-ı Refîʻa kazâsı muzâfâtından Terkos nâhiyesine tâbi‘ Ormanlı karyesinde sâkine iken bundan akdem vefât eden Mustafa Ağa b. Hasan’ın verâseti zevce-i menkûha-i metrûkesi Fâtıma Hatun bt. Abdullah ile sulbî sagīr oğlu Ali’ye münhasıra ve tashîh-i meselesi sekiz sehmden i‘tibâr olunup sihâm-ı mezbûreden bir sehmi zevcesi mezbûreye ve yedi sehmi sagīr-i mezbûr Ali’ye isâbeti tahakkukundan sonra sagīr-i mezbûrun vâlidesi ve tesviye-i umûruna bâ-hüccet-i şer‘iyye mansûbe vasiyyesi olup zâtı ta‘rîf-i şer‘î ile mu‘arrefe olan işbu râfiʻatü’l-kitâb Fâtıma Hatun bt. Abdullah meclis-i şer‘-i şerîf-i enverde takrîr-i kelâm ve tâʻbir ani’l-merâm edip zevcim müteveffâ-i mezbûrun ile’l-vefât yedinde mülk ve hakkı idiği müsbet olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât çiftlik tâʻbir olunur mülk menzilden tashîh-i merkūm üzere bir sehm hissemi beyʻ murâd eylediğimde sagīr-i mezbûrun yedi sehm hissesi harâbe müşrif olup hâsılı harcına vefâ etmediğinden mâ‘adâ sagīr-i mezbûrun ta‘mîr ve termîme mâlı olmayıp ve bekāsı dahi muzır olmağla sâlifü’z-zikr çiftlik tâʻbir olunur mülk menzilden tashîh-i merkūm üzere bir sehm hissem ile sagīr-i mezbûrun yedi sehm hissesi ma‘an sûk-ı sultânîde baʻde’l-müzâyede ve inkıtâʻi’r-rağbe semen-i misli ile âhara beyʻ ve semeni istirbâh olunmak sagīr-i mezbûr hakkında her vechile enfa‘ ve evlâ [46a] olmağla kıbel-i şer‘den âhara beyʻe izin olunmak matlûbumdur dedikde vasiyye-i mezbûrenin kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütekarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri ber-vech-i muharrer çiftlik tâʻbir olunur menzili âhara beyʻa kıbel-i şer‘den izin verilmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Zilkaʻdeti’ş-şerîfe sene semân ve hamsîn ve mi’e ve elf. Şuhûdü’l-hâl: Şâhidûnü’s-sâbıkūn.