Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 235 Hüküm no: 184 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Abdülhalim’in vârislerinin terekeden hisselerini alarak birbirlerinin zimmetlerini ibra etmeleri Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydarî Nakşibendî Mahallesiʼnde sâkin iken bundan akdem vefât eden Derviş Abdülhalim b. Ömer Efendi’nin hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Âişe Hatun bt. Yusuf ile sulbiye kebîre kızı Fâtıma Hatun’a ve li-ebeveyn kız karındaşı Afife Hatun’a münhasıra olduğu şer‘an zâhir ve müteʻayyen oldukdan sonra zâtı ta‘rîf-i şer‘î ile mu‘arrefe olan mezbûre Afife Hatun meclis-i ma‘kūd-ı mezkûrda müteveffâ-i mezbûrun terekesine bi’l-verâse vâzıʻayi’l-yed olan işbu râfiʻayü’l-kitâb mezbûretân Âişe ve Fâtıma nâm hatunlar mahzarlarında bi’l-verâse ikrâr-ı tâm ve takrîr-i kelâm edip karındaşım müteveffâ-i mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm hisseme isâbet eden beş bin kırk iki akçeyi terekeden olmak üzere mezbûretân Âişe ve Fâtıma nâm hatunlar bana def‘ ve teslîm, ben dahi ber-vech-i muharrer meblağ-ı mezbûru mezbûretân yedlerinden bi’l-verâse ahz u kabz eyledim, baʻde’l-yevm müteveffâ-i mezbûrun terekesinden kalîl ü kesîr celîl ü hakīr ma‘lûm ve mechûle müte‘allika âmme-i mîrâs da‘vâsından mezbûretân Âişe ve Fâtıma nâm hatunların zimmetlerini bi’l-verâse ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb husûs-ı mîrâsa müte‘allik katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Zilkaʻdeti’ş-şerîfe li-sene semân ve hamsîn ve mi’e ve elf. Şuhûdü’l-hâl: Ahmed Ağa b. Mustafa, Halil b. İbrahim, Ahmed Ağa b. ( ), Mustafa Beşe b. ( ), Hasan Beşe b. ( ), Feyzullah Çelebi b. ( ).