Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 242 Hüküm no: 192 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Duka’nın vârislerinin terekedeki hisselerini alarak birbirlerinin zimmetlerini ibra etmeleri Havâss-ı Refîʻa kazâsına tâbi‘ Avas karyesinde mütemekkin iken bundan akdem hâlik olan Yamandi v. Duka’nın verâseti zevce-i metrûkesi Marye bt. Köri nâm Nasrâniye ile sulbiye kebîre kızı Zafirce’ye? ve li-ebeveyn er karındaşları Yano ve Anaştaş ve Kosta nâm zimmîlere ve li-ebeveyn kız karındaşı Seltane nâm Nasrâniye’ye münhasıra ve tashîh-i meseleleri elli altı sehmden i‘tibâr olunup sihâm-ı mezbûreden yedi sehmi zevcesine ve yirmi sekiz sehmi kızı Zafirce nâm Nasrâniye’ye ve altışar sehmi karındaşları mesfûrûn Yano ve Anaştaş ve Kosta nâm zimmîlerden herbirine ve üç sehmi kız karındaşı mesfûre Seltane nâm Nasrâniye’ye isâbeti tahakkukundan sonra mesfûre Seltane nâm Nasrâniye tarafından husûs-ı âti’l-beyânda vekîl olduğunu şahsı bi’l-ma‘rifeti’ş-şer‘iyye ârifân Kostantin v. İskerlet ve Dimitri b. Zafiri nâm zimmîler şehâdetleriyle vekâleti sâbit olan karındaşı mesfûr Anaştaş nâm zimmî ile mesfûrân Yano ve Kosta zimmîler meclis-i şer‘-i şerîf-i enverde hâlik-i mezbûrun terekesine bi’l-verâse vâzıʻata’l-yed olan işbu râfiʻati’s-sifr mesfûretân Marye ve Zafirce nâm Nasrâniyeler muvâcehelerinde herbiri bi’l-verâse ve’l-vekâle ikrâr-ı tâm ve takrîr-i kelâm edip karındaşımız hâlik-i mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere hissemize isâbet eden yirmi dört bin seksen yedi akçe terekeden olmak üzere mesfûretân Marye ve Zafirce bize def‘ ve teslîm, biz dahi meblağ-ı mezbûru bi’l-verâse ve’l-vekâle bi-kadri’l-hısas herbirimiz yedlerinden bi’t-tamam ve’l-kemâl ahz u kabz eyledik, baʻde’l-yevm karındaşımız hâlik-i mesfûrun mâl ıtlâk olunur terekesinden hâric ez-defter ve dâhil-i defter kalîl ü kesîr celîl ü hakīr ma‘lûm ve gayr-ı ma‘lûm terekesine müte‘allika âmme-i mîrâs da‘vâsından mesfûretân Marye ve Zafirce nâm Nasrâniyelerin zimmetlerini herbirimiz bi’l-verâse ve’l-vekâle ibrâ-i âmm-ı kātıʻu’n-nizâ‘la ibrâ ve ıskāt eylediğimizde ânlar dahi ber-vech-i muharrer kezâlik bizim zimmetimizi ibrâ ve ıskāt edip husûs-ı mîrâsa müte‘allika birbirimiz ile katʻâ da‘vâ ve nizâ‘ımız yokdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Çelebi b. İbrahim, Hüseyin Çelebi b. Mehmed. [48b] Miso v. Simo, Vasilaki v. Kiraki, Papa Yani ve Hıristoli v. Vasil, Dimitraki v. Kiraki, Yamandeki v. Kiraki, Terzi İstepan, Dimitri v. Kiraki, Yanaki v. Nikola, Bakkāl Yorgi, Kosta v. Yorgo, Hıristoli v. Organe, Yorgaki v. Duka, Foti v. Apostol.