Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 243 Hüküm no: 193 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Duka’nın vârislerinin kendilerine düşen ev ve bağlardaki hisselerini diğer vârislerine satmaları Havâss-ı Refîʻa kazâsına tâbi‘ Avas karyesinde mütemekkin iken bundan akdem hâlik olan Yamandi v. Duka’nın verâseti zevce-i metrûkesi Marye bt. Köri nâm Nasrâniye ile sulbiye kebîre kızı Zafirce’ye ve li-ebeveyn er karındaşları Yano ve Anaştaş ve Kosta nâm zimmîlere ve li-ebeveyn kız karındaşı Seltane nâm Nasrâniye’ye münhasıra ve tashîh-i meseleleri elli altı sehmden i‘tibâr olunup sihâm-ı mezbûreden yedi sehmi zevcesine ve yirmi sekiz sehmi kızı Zafirce nâm Nasrâniye’ye ve altışar sehmi karındaşları mesfûrûn Yano ve Anaştaş ve Kosta nâm zimmîlerden herbirine ve üç sehmi kız karındaşı mesfûre Seltane nâm Nasrâniye’ye isâbeti tahakkukundan sonra mesfûre Seltane v. İskerlet ve Dimitri v. Zafiri nâm zimmîler şehâdetleriyle vekâleti sâbit olan karındaşı mesfûr Anaştaş nâm zimmî ile mesfûrân Yano ve Kosta nâm zimmîler meclis-i şer‘-i şerîf-i enverde işbu râfiʻatü’s-sifr mesfûretân Marye ve Zafirce nâm Nasrâniyeler muvâcehelerinde herbiri bi’l-verâse ve’l-vekâle ikrâr-ı tâm ve takrîr-i kelâm edip karındaşımız hâlik-i mezbûrun ile’l-helâk yedinde mülkü ve hakkı idiği müsbet olup karye-i mezbûrede vâki‘ bir tarafdan Palaşa nâm Nasrâniye mülkü ve bir tarafdan Seksengöz veresesi mülkü ve iki tarafdan tarîk-i âm ile mahdûd fevkānî bir bâb oda ve bir sofa ve kenîf ve camâşûrhâne ve havluyu muhtevî mülk menzilden tashîh-i merkūm üzere karındaşımız hâlik-i mezbûrdan bize isâbet eden yirmi bir sehm hisse-i irsiyyemizi ve kezâlik karye-i mezbûre hudûdu dâhilinde vâki‘ bir tarafdan Gerci zimmî bağı ve bir tarafdan Nikola bağı ve bir tarafdan Gercisi tarlası ve bir tarafdan tarîk-i âm ile mahdûd tahmînen dört dönüm kürûmî mülk bağdan karındaşımız hâlik-i mezbûrdan tashîh-i merkūm üzere bize isâbet eden yirmi bir sehm hisse-i irsiyyemizi ve yine kezâlik karye-i mezbûre hudûdu dâhilinde vâki‘ bir tarafdan Vesinyo bağı ve bir tarafdan Hıristo bağı ve bir tarafdan Gürcü bağı ve bir tarafdan tarîk-i âm ile mahdûd tahmînen on dönüm kürûmî mülk bağdan karındaşımız hâlik-i mezbûrdan tashîh-i merkūm üzere bize isâbet eden yirmi bir sehm hisse-i irsiyyemizi cemî‘ tevâbiʻ ve levâhıkları ile bi-safkatin vâhidetin tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mesfûretân Marye ve Zafirce nâm Nasrâniyelere yirmi dört bin seksen yedi akçeye ale’l-iştirâki’s-seviyy herbirimiz bi’l-verâse ve’l-vekâle beyʻ ve temlîk ve teslîm eylediğimizde ânlar dahi ber-vech-i muharrer iştirâ ve temellük ve tesellüm ve kabûl ve kabz eylediklerinden sonra semenleri olan meblağ-ı mezbûr yirmi dört bin seksen yedi akçeyi herbirimiz bi’l-verâse ve’l-vekâle bi-kadri’l-hısas bi’t-tamam ve’l-kemâl ahz u kabz eyledik, baʻde’l-yevm menzil-i mahdûd-ı mezkûr ile zikr olunan iki kıt‘a bağlarda olan tashîh-i merkūm üzere yirmi bir sehm hisse-i irsiyyemizde katʻâ alâka ve medhalimiz kalmayıp mesfûretân Marye ve Zafirce nâm Nasrâniyelerin ale’l-iştirâki’s-seviyy mülk-i müşterâları ve hakk-ı sırfları olmuşdur, mutasarrıfân olsunlar dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe sene semân ve hamsîn ve mi’e ve elf. Şuhûdü’l-hâl: Eş-Şâhidûnü’s-sâbıkūn.