Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 255 Hüküm no: 205 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asılarak ölen Kasako v. Kino’nun terekesinin Premedi kazasındaki vârislerine ulaştırılması için Panko v. Biço’nun vasi ve kayyım tayin edilmesi Havâss-ı Refîʻa kazâsına tâbi‘ Litros karyesinde mütemekkin iken bundan akdem maslûben hâlik olan Habbâz Kasako v. Kino nâm zimmînin vilâyet-i Rumeli’nde Avlonya sancağında Premedi kazâsına tâbi‘ Bosnat nâm karyede mütemekkine zevce-i metrûkesi Sore bt. Koçi nâm Nasrâniye ile sulbî kebîr oğlu Kosta ve sagīr oğlu Dimitri ve sulbiye sagīre kızı İlyo’nun hisse-i irsiyyelerini ahz u kabz zabt u hıfza ve kendülere îsâle kıbel-i şer‘den bir vasî ve kayyım nasbı lâzım [51b] ve mühim olmağın emânet ile ma‘rûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’s-sifr Panko v. Biço nâm zimmîyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûrûnun hisse-i irsiyyelerini ahz u kabz ve zabt u hıfza ve kendülere îsâle vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremi’l-harâm sene tisʻa ve hamsîn ve mi’e ve elf. Şuhûdü’l-hâl: Bostancıbaşı ağa hazretlerinin çukadârı Ali Ağa, el-Hâc Hasan Haseki b. Mustafa, İsmail Haseki b. Mehmed, Ali Usta b. Ahmed, Bölükbaşı Mustafa Ağa b. Yusuf. Panko v. Zato, Kosta v. Hıristo, Nikola v. Hıristo, Kanos v. Angeli, Kostalazi v. Dimitri.