Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 259 Hüküm no: 209 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin asılarak vefât eden Seyyid Hasan’ın amcası ve tek vârisi olduğunu ispatlaması Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Ali Paşa-yı Cedîd Mahallesi ahâlîsinden Çalıkkavak zaʻîmi demekle ma‘rûf İsmail Ağa’nın sâkin olduğu menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde vilâyet-i Rumeli’nde Eski Cuma kasabası sâkinlerinden olup bundan akdem maslûben vefât eden es-Seyyid Hasan b. es-Seyyid Şaʻban’ın ber-vech-i âtî ammisi ve hasren vârisi olduğunu iddiʻâ eden sâlifü’z-zikr menzil-i mezkûrda müsâfiren sâkin işbu râfiʻü’l-kitâb es-Seyyid Ali b. es-Seyyid Mehmed meclis-i ma‘kūd-ı mezkûrda sâbıkā Hatvan ağası olup zikri âtî kılıç ile tüfenge vaz‘-ı yedi mütehakkık olan fahrü’l-akrân el-Hâc Ahmed Ağa b. el-Hâc Mehmed mahzarında üzerine da‘vâ ve takrîr-i kelâm edip müteveffâ-i mezbûrun babası es-Seyyid Şaʻban ile ben li-ebeveyn karındaşlar olup babamız ismi es-Seyyid Mehmed, dedemiz ismi es-Seyyid İsa ve anamız ismi Fâtıma ve maskat-ı re’simiz sâlifü’z-zikr Eski Cuma kasabasından olmağla müteveffâ-i mezbûrun ben li-ebeveyn ammisi ve hasren vârisi ve terekesine benden gayrı müstahikk-ı âhar olmayıp mûmâ-ileyh el-Hâc Ahmed Ağa mûrisim müteveffâ-i mezbûrun zikr olunan beş guruş kıymetli kılıç ile on guruş kıymetli tüfengini ahz ve zimmetinde olmağla bi’l-verâse taleb ederim, suâl olunsun dedikde gıbbe’s-suâl mûmâ-ileyh el-Hâc Ahmed Ağa cevâbında zikri mürûr eden kılıç ile tüfenk zimmetinde olduğunu ikrâr lâkin müdde‘î-i mezbûrun ber-vech-i muharrer müddeʻâsını inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mârru’z-zikr Eski Cum‘a kasabası sâkinlerinden mahalle-i mezbûrede müsâfiren sâkin es-Seyyid Abdulkādir Ağa b. es-Seyyid Receb ve Ahmed Bey b. Ömer nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka sâlifü’z-zikr Eski Cum‘a kasabası sâkinlerinden olup bundan akdem maslûben vefât eden es-Seyyid Hasan’ın babası es-Seyyid Şaʻban ile işbu müdde‘î-i mezbûr es-Seyyid Ali li-ebeveyn karındaşlar olmağla babaları ismi es-Seyyid Mehmed ve dedeleri ismi es-Seyyid İsa ve anaları ismi Fâtıma ve maskat-ı re’sleri mârru’z-zikr Eski Cum‘a kasabasından olup müteveffâ-i mezbûrun li-ebeveyn ammisi ve hasren vârisidir, bundan gayrı vâris ve terekesine müstahikk-ı âhar olduğu ma‘lûmumuz değildir, biz bu [52b] husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun verâsetine baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘îden Çukadâr Ahmed Ağa b. Hamdi Mehmed ve Muhzır es-Seyyid Ahmed b. es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunmağın mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharremi’l-harâm sene tisʻa ve hamsîn ve mi’e ve elf. Şuhûdü’l-hâl: Es-Seyyid Abdulkādir Ağa b. es-Seyyid Mustafa sâkin-i Osmanpazarı, Hasan Ağa b. İsmail, Mehmed Ağa b. İsmail, İbrahim Çelebi b. Mehmed, İsmail Çelebi b. Yusuf, Osman Ağa b. Mustafa.