Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 258 Hüküm no: 208 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin, yeğeninin ölümüne sebep olan el-Hâc Ahmed Ağa’ya karşı açtığı davanın sulh ile sonuçlanması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Ali Paşa-yı Cedîd Mahallesi ahâlîsinden Çalıkkavak zaʻîmi demekle ma‘rûf İsmail Ağa’nın sâkin olduğu menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde vilâyet-i Rumeli’nde Eski Cum‘a kasabası sâkinlerinden olup bundan akdem maslûben vefât eden es-Seyyid Hasan b. es-Seyyid Şaʻban’ın li-ebeveyn ammisi ve hasren vârisi olan es-Seyyid Ali b. es-Seyyid Mehmed meclis-i ma‘kūd-ı mezkûrda sâbıkā Hatvan ağası olan fahrü’l-akrân işbu râfiʻü’l-kitâb el-Hâc Ahmed Ağa b. el-Hâc Mehmed mahzarında bi’l-verâse ikrâr-ı tâm ve takrîr-i kelâm edip mûrisim müteveffâ-i mezbûr es-Seyyid Hasan nâm kimesneyi Osmanpazarı kazâsına tâbi‘ Çalıkkavak nâm karye kurbünde salb eyledin deyü mûmâ-ileyh el-Hâc Ahmed Ağa’dan da‘vâya tasaddî eylediğimde beynimizde münâzaʻât-ı kesîre ve muhâsamât-ı şedîde vâkıʻa olup el-hâletü hâzihî da‘vâ-yı mezkûremden fâriğ ve yüz yetmiş guruş üzerine mûmâ-ileyh el-Hâc Ahmed Ağa ile musâlaha olduğumda ol dahi ber-vech-i muharrer sulh-ı mezbûru baʻde’l-kabûl ve bedel-i sulh olan meblağ-ı mezbûru yedinden bi’l-verâse ahz u kabz eyledim, baʻde’l-yevm mûrisim müteveffâ-i mezbûrun dem ve diyetine müte‘allika âmme-i da‘vâdan mûmâ-ileyh el-Hâc Ahmed Ağa’nın zimmetini bi’l-verâse ibrâ-i âmm-ı kātıʻu’n-nizâ‘la ibrâ ve ıskāt edip vechen mine’l-vücûh ve sebeben mine’l-esbâb katʻâ da‘vâ ve nizâ‘ım yokdur, eğer ben husûs-ı mezkûra müte‘allik da‘vâya tasaddî edersem lede’l-hükkâmi’l-kirâm mesmûʻa eylemesin dedikde gıbbe’t-tasdîki’ş-şerʻî vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘îden Çukadâr Ahmed Ağa b. Hamdi Mehmed ve Muhzır es-Seyyid Ahmed b. es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Muharremi’l-harâm li-sene tisʻa ve hamsîn ve mi’e ve elf. Şuhûdü’l-hâl: Es-Seyyid Abdulkādir Ağa b. es-Seyyid Mustafa sâkin-i Osmanpazarı, Hasan Ağa b. İsmail, İbrahim Çelebi b. Mehmed, İsmail Çelebi b. Yusuf, Osman Ağa b. Mustafa, Hasan Beşe b. Mustafa, es-Seyyid Mehmed b. es-Seyyid Mustafa, Mehmed b. Abdullah.