Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 270 Hüküm no: 219 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin vârisleri arasındaki anlaşmazlığın sulh ile sonuçlanması Havâss-ı Refîʻa kazâsı muzâfâtından Terkos nâhiyesine tâbi‘ Hisarbeyli karyesinde sâkin iken bundan akdem vefât eden Mehmed Beşe b. İbrahim’in verâseti zevce-i menkûha-i metrûkesi Âişe Hatun bt. ( ) ile sulbiye kebîre kızı Hanife Hatun ve li-ebeveyn kız karındaşları Fâtıma ve diğer Âişe nâm hatunlara münhasıra ve tashîh-i meseleleri on altı sehmden i‘tibâr olunup sihâm-ı mezbûreden iki sehmi zevcesi mezbûreye ve sekiz sehmi kızı mezbûre Hanife Hatun’a ve üçer sehmi kız karındaşları mezbûretân Fâtıma ve diğer Âişe nâm hatunlara isâbeti tahakkukundan sonra zâtlarını zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûretân Fâtıma ve diğer Âişe nâm hatunlar meclis-i şer‘-i şerîf-i enverde müteveffâ-i mezbûrun terekesine bi’l-verâse vâzıʻateyi’l-yed olan işbu râfiʻateyi’l-kitâb mezbûretân Âişe Hatun’un dâmâdı ve Hanife nâm hatunun zevci ve taraflarından zikri âtî husûsda tasdîka sâbitü’l-vekâle vekîlleri olan Ahmed Beşe b. Ali mahzarında herbiri bi’l-verâse ikrâr-ı tâm ve takrîr-i kelâm edip karındaşımız müteveffâ-i mezbûrun terekesinden hâric ez-defter iki bin beş yüz guruş ketb ve ihfâ eylediler deyü müvekkiletân-ı mezbûretân Âişe ve Hanife nâm hatunlar ile vekîl-i merkūm Ahmed Beşe’den tashîh-i merkūm üzere meblağ-ı mezbûrdan hisse-i irsiyyemizi hala? da‘vâya tasaddî eylediğimizde ânlar dahi meblağ-ı mezbûru bi’l-külliye inkâr etmekle bu vechile beynlerimizde münâzaʻât-ı kesîre ve muhâsamât-ı şedîde vâkıʻa olmuş idi. El-hâletü hâzihî muslihûn tavassut etmekle vekîl-i merkūm Ahmed Beşe an-inkâr bizim ile yüz guruş üzerine bi’l-vekâle musâlaha olduğunda biz dahi ber-vech-i muharrer herbirimiz bi’l-verâse sulh-ı mezbûru baʻde’l-kabûl ve bedel-i sulh olan meblağ-ı mezbûru vekîl-i merkūm Ahmed Beşe yedinden herbirimiz bi’l-verâse bi’t-tamam ahz u kabz eyledik, müddeʻâmız olan meblağ-ı mezbûr ile karındaşımız müteveffâ-i mezbûrun terekesinden hâric ez-defter ve dâhil-i defter kalîl ü kesîr, celîl ü hakīr, ma‘lûm ve mechûle müte‘allika âmme-i mîrâs da‘vâsından müvekkiletân-ı mezbûretân Âişe ve Hanife nâm hatunlar ile vekîl-i merkūm Ahmed Beşe’nin ve gāib ani’l-meclis Memiş Beşe nâm kimesnenin husûs-ı mezbûra müteʻallika zimmetlerini bi’l-verâse herbirimiz ibrâ ve ıskāt eylediğimizde vekîl-i merkūm Ahmed Beşe dahi bedel-i sulh deyü bize medfû‘u olan meblağ-ı mezbûr yüz guruş mütâlebesinden bizim zimmetimizi ibrâ ve ıskāt edip baʻde’l-yevm husûs-ı mîrâsa müte‘allika vechen mine’l-vücûh ve sebeben mine’l-esbâb katʻâ birbirimiz ile da‘vâ ve nizâ‘ımız yokdur dediklerinde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fî-gurreti min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Hasan Beşe b. Hüseyin, Ali Beşe b. Mehmed, Vâlide Sarayı Bölükbaşısı Ahmed Ağa b. Mustafa, Serdâr Mehmed Ağa b. Hüseyin, Mehmed Ağa b. Ali, Bostanî Ahmed Bey b. İbrahim, hüddâm-ı mahkeme.