Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 272 Hüküm no: 221 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vârisi olan oğlu Mustafa’nın kendine düşen ev hissesini halası Ayşe ‘ye satması Medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Davud Ağa Mahallesiʼnde vâki‘ bir tarafdan Müezzin Vakfı ve bir tarafdan Hüseyin Ağa mülkü ve bir tarafdan müşteriye Âişe Hatun mülkü ve bir tarafdan tarîk-i âm ile mahdûd büyût-ı adîdeyi müştemil mülk menzilin nısf-ı şâyiʻine mutasarrıfe iken bundan akdem vefât eden Râbia bt. Ali nâm hatunun verâseti sulbî kebîr oğlu Mustafa ile sulbiye kebîre kızı Fâtıma’ya münhasıra, mesele-i mîrâsları üç sehmden olup sihâm-ı mezbûreden iki sehmi mezbûr Mustafa’ya ve bir sehmi mezbûre Fâtıma’ya isâbeti tahakkukundan sonra mezbûr Mustafa meclis-i şer‘-i şerîf-i enverde menzil-i mezbûrun nısf-ı şâyiʻ-i âharına mutasarrıfe olan ammetesi işbu bâ‘isetü’l-kitâb Âişe bt. İbrahim nâm hatun mahzarında ikrâr ve takrîr-i kelâm edip ber-mûceb-i tashîh-i mezkûr menzil-i mezkûrun nısf-ı şâyiʻinden benim hisseme isâbet eden iki sehm hissemi bi-cümleti’t-tevâbiʻ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Âişe Hatun’a altmış dört guruşa beyʻ ve temlîk ve teslîm eylediğimde ol dahi ber-vech-i meşrûh iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm altmış dört guruşu mezbûre Âişe Hatun yedinden tamamen ahz u kabz eyledim, baʻde’l-yevm menzil-i mahdûd-ı mezkûrdan nısf-ı şâyiʻinin iki sehminde alâka ve medhalim kalmayıp mezbûre Âişe Hatun’un mülk-i müşterâsı olmuşdur, keyfe mâ teşâ ve tahtâr mutasarrıf olsun dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferi’l-hayr sene tisʻa ve hamsîn ve mi’e ve elf. Şuhûdü’l-hâl: Es-Seyyid Mustafa Efendi [b.] es-Seyyid Ahmed ve Ahmed Efendi b. Mustafa, Halil Efendi el-Mukayyid ve İsmail b. Mehmed ve Osman b. Abdullah ve Mollâ İbrahim b. Mehmed ve Muhzırbaşı Mehmed b. Abdullah, Musa Bey b. Receb.