Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 273 Hüküm no: 222 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin, vârisi olduğu Hüseyin b. Mehmed’in terekesini aldığı Vilâyet-i Rumeli’nde Avlonya kazâsına tâbi‘ Rok karyesi ahâlîsinden olup Havâss-ı Refîʻa kazâsına tâbi‘ Makrihora karyesinde Sadullah Efendi Bağçesi’nde mütemekkin Bağçevân Milo v. Körki nâm zimmînin bağçevânlık hizmetinde olup bundan akdem vefât eden Hüseyin b. Mehmed’in li-ebeveyn ammisi ve hasren vârisi olduğunu karye-i mezbûrede beytülmâl kabzına meʼmûr olan işbu hâzır bi’l-meclis fahrü’l-akrân Resul Bey b. İbrahim nâm kimesne mahzarında şuhûd-ı udûlden Mollâ Mustafa b. Mustafa ve Hüseyin b. Ahmed nâm kimesneler şehâdetleriyle vech-i şer‘î üzere isbât eden Ba[y]rakdâr? Ali Beşe b. Hüseyin meclis-i şer‘-i şerîf-i enverde işbu râfiʻü’s-sifr [56a] mesfûr Milo nâm zimmî muvâcehesinde bi’l-verâse ikrâr-ı tâm ve takrîr-i kelâm edip mûrisim müteveffâ-i mezbûrun terekesinden yirmi dört guruş mesfûr Milo zimmî zimmetinde olmağla mezbûrdan altı guruşu müteveffâ-i mezbûrun techîz ve tekfînine harc u sarf edip bâkī on sekiz guruş kalmağla meblağ-ı bâkī-i mezbûru mesfûr Milo zimmî bana def‘ ve teslîm, ben dahi ber-vech-i muharrer meblağ-ı bâkī-i mezbûru yedinden bi’l-verâse ahz u kabz eyledim ve kezâlik mûrisim müteveffâ-i mezbûrun terekesinden bir tek tüfenk ve bir köhne kebe emîn-i merkūm Resul Bey beytülmâl olmak zuʻmuyla vaz‘-ı yed etmekle sâlifü’z-zikr tüfenk ile kebeyi dahi ahz u kabz edip baʻde’l-yevm mûrisim müteveffâ-i mezbûrun terekesine müte‘allika âmme-i mîrâs da‘vâsından mesfûr Milo zimmî ile işbu hâzır bi’l-meclis Hıristo v. Yani ve gāib ani’l-meclis Tanaş v. Hıristan nâm zimmîlerin zimmetlerini bi’l-verâse ibrâ ve ıskāt edip vechen mine’l-vücûh ve sebeben mine’l-esbâb husûs-ı mezbûr[a müte‘allika] katʻâ da‘vâ ve nizâ‘ım yokdur dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’r-râbiʻ aşer min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Ahmed Efendi b. Mustafa, Ahmed Ağa [b.] Hamdi Mehmed, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Halil Efendi b. Ahmed Efendi el-Mukayyid.