Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 285 Hüküm no: 233 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Memiş’in vefâtından sonra vasiyetini yerine getirmek ve terekesini vârislerine ulaştırmak üzere amcasının oğlu Aydın Beşe’yi vasi tayin etmesi Havâss-ı Refîʻa kazâsında Topkapı hâricinde Bayrampaşa kurbünde Kürd İbrahim Paşa Bağçesi demekle ma‘rûf bağçede sâkin Ömer b. Memiş b. Ali tarafından husûs-ı âti’l-beyânda vekîl olduğu Hasan Beşe b. Ali ve İbrahim Beşe b. Mustafa şehâdetleriyle şer‘an sâbit ve sübût-ı vekâletine hükm-i şer‘î lâhık olan İsa Beşe b. Aydın meclis-i şer‘-i şerîf-i enverde müvekkil-i mezbûrun ammizâdesi işbu râfiʻü’l-kitâb Aydın Beşe b. Ali mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Ömer ben bi-emri’llâhi te‘âlâ vefât eylediğimde sâlifü’z-zikr bağçe-i mezbûrede vâki‘ rub‘ hissem ile sâir terekemi ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemi vilâyet-i Rumeli’nde Premedi kazâsına tâbi‘ Delvine nâm karyede sâkine zevcem Sâliha Hatun bt. Ali ile vâlidem Neslihan ve sulbî oğullarım Aslan ve Mehmed ve Feyzullah’a îsâl oluna deyü tenfîzine işbu mezbûr Aydın Beşe’yi vasiyy-i muhtâr nasb u ta‘yîn eyledim dedi dedikde ol dahi ber-vech-i muharrer vesâyet-i mezbûreyi baʻde’l-kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fî-gurreti min-Rebîʻi’l-evvel sene tisʻa ve hamsîn ve mi’e ve elf. Şuhûdü’l-hâl: Bağçevânlar Kethüdâsı Ahmed Ağa b. Mehmed, Hasan Beşe b. Ali, Mustafa Beşe b. Hasan, Mehmed Ağa b. Ahmed Kethüdazâde, İbrahim Beşe b. Mustafa.