Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 286 Hüküm no: 234 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa bostancılarından Bahçıvan Arnavud Hasan’ın beytülmâla kalan terekesinin Vâlidesarayı Ustası Seyyid Ali Ağa’ya satılması Fi’l-asl vilâyet-i Rumeli’nde Tepedelen kazâsına tâbi‘ Çubuk karyesinde hâlâ sâkin olup bundan akdem vefât eden Hadîka-i Hâssa bostanîlerinden Bağçevân Arnavud Hasan b. Hüseyin’in zâhirde vâris-i ma‘rûfu olmayıp terekesi cânib-i beytülmâla âid olmağla tâife-i mezbûrûnun bâ-hatt-ı hümâyûn-ı şevket-makrûn beytülmâlını kabza meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn hâlâ bi’l-fi‘il bostancıbaşı sa‘âdetlü Hüseyin Ağa b. Mustafa taraf-ı bâhirü’ş-şereflerinden husûs-ı âti’l-beyânda beyʻa sâbitü’l-vekâle vekîlleri Çukadâr el-Hâc Yusuf Ağa b. Abdullah medîne-i Hazret-i Eyüb’de meclis-i şer‘-i şerîf-i enverde hâlâ Vâlide Sarayı ustası işbu râfiʻü’l-kitâb fahrü’l-akrân es-Seyyid Ali Ağa b. Mus[tafa] mahzarında bi’l-vekâle ikrâr-ı tâm ve takrîr-i kelâm edip müteveffâ-i mezbûrun Havâss-ı Refîʻa kazâsında Topkapısı hâricinde Bayrampaşa’da (…) bostanı demekle ma‘rûf bostan derûnunda mezrû‘ sebzevât ve sâir âlât-ı bostandan nısf hisse müteveffâ-i mezbûrun olmağla nısf hisse-i mezkûreyi Bağçevânlar Kethüdâsı Ahmed Ağa ve yiğidbaşıları ve sâir bağçevân ustaları beynlerinde müzâyede olundukda ragabât-ı nâs bi’l-külliye münkatıʻa oldukdan sonra mezbûr es-Seyyid Ali Ağa usta ağa üzerinde on dokuz bin elli akçede karâr edip ziyâde ile tâlib-i âhar zuhûr etmeyip ve meblağ-ı mezbûr hisse-i mezkûrenin el-yevm semen-i misli olduğunu zeyl-i vesîkada muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mezbûr es-Seyyid Ali Usta Ağa’ya semen-i misli o[lan] [59a] meblağ-ı mezbûr on dokuz bin elli akçeye bi’l-vekâle beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen-i misli olan meblağ-ı mezbûr on dokuz bin elli akçeyi mezbûr es-Seyyid Ali Usta Ağa yedinden bi’l-vekâle ahz u kabz eyledim, baʻde’l-yevm nısf hisse-i mezkûre merkūm es-Seyyid Ali Usta Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’t-tâsiʻ ve’l-ışrîn min-Saferi’l-hayr li-sene tisʻa ve hamsîn ve mi’e ve elf. Şuhûdü’l-hâl: Bağçevânlar Kethüdâsı Ahmed Ağa b. Mehmed, Ali Beşe b. İbrahim, Mustafa Beşe b. Hasan, Ömer b. Hasan, Aydın Beşe b. Ali, Vâlide Saray Ser-bölük Ahmed Ağa b. Mustafa.