Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 297 Hüküm no: 245 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Havva Hatun’un vasiyetini yerine getirmek üzere kız kardeşi Rukiye Hatun’u vasi tayin etmiş olduğu
Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Paşa Mahallesiʼnde sâkine iken bundan akdem vefât eden Havvâ Hatun bt. İbrahim’in hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin li-ebeveyn kız karındaşı ve sulbiye sagīre kızı Emine’nin hâletesi olup ta‘rîf-i şer‘î ile mu‘arrefe olan işbu râfiʻatü’l-kitâb Rukiye Hatun bt. el-mezbûr İbrahim meclis-i ma‘kūd-ı mezkûrda sagīre-i mezbûrenin ammisi olmağla müteveffât-ı mezbûrenin terekesine vasiyy-i muhtâr olmak zuʻmuyla vaz‘-ı yed eden es-Seyyid Mahmud Efendi b. es-Seyyid Mehmed mahzarında üzerine da‘vâ ve takrîr-i kelâm edip kız karındaşım müteveffât-ı mezbûre Havvâ Hatun bt. İbrahim b. Abdullah ben bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemden ancak bin iki yüz akçe ıskāt-ı salât-ı fâʼitem oluna ve altı yüz akçe dahi kefâret-i yemîn için oluna ve işbu sulbiye sagīre kızım Şerife Emine’nin vakt-i rüşd ü sedâdına varınca tesviye-i umûruna merkūm es-Seyyid Mahmud Efendi’yi târîh-i kitâbdan altı ay mukaddem vasiyy-i muhtâr nasb u ta‘yîn etmiş idi, lâkin vesâyet-i mezbûreden rücû‘ ve merkūm es-Seyyid Mahmud Efendi[‘yi] [61b] azl ve ihrâc edip fevtinden elli gün mukaddem vech-i muharrer üzere huzûr-ı Müslimîn’de beni vasiyy-i muhtâr nasb u ta‘yîn etmeğin ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûre Havvâ Hatun musırran alâ-îsâʼihâ fevt olmağla tenfîz-i vesâyâ murâd ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûrede sâkin İbrahim Efendi b. Yusuf ve Hasan Beşe b. Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffât-ı mezbûre Havvâ Hatun bt. İbrahim b. Abdullah ben bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemden ancak bin iki yüz akçe ıskāt-ı salât-ı fâʼitem oluna ve altı yüz akçe dahi kefâret-i yemîn için oluna ve işbu sadriye sagīre kızım Şerife Emine’nin vakt-i rüşd ü sedâdına varınca tesviye-i umûruna merkūm Mahmud Efendi’yi vasiyy-i muhtâr nasb u ta‘yîn etmiş idi lâkin vesâyet-i mezbûreden rücû‘ ve merkūm es-Seyyid Mahmud Efendi’yi azl ve ihrâc edip fevtinden elli gün mukaddem vech-i muharrer üzere bizim huzûrumuzda işbu müdde‘iye-i mezbûre Rukiye Hatun’u vasiyy-i muhtâr nasb u ta‘yîn etmeğin ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûre Havvâ Hatun musırran alâ-îsâʼihâ vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ba‘s olunan Çukadâr Ahmed Ağa b. Hamdi ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunmağın mâ-hüve’l-vâki‘ bi’t-taleb ketb olundu.
Fi’l-yevmi’r-râbiʻ min-Rebîʻi’l-evvel sene tisʻa ve hamsîn ve mi’e ve elf, 1159.
Şuhûdü’l-hâl: el-Hâc Ali b. Halil, Mollâ Hasan b. Mehmed, Mollâ Mehmed b. Süleyman, Mollâ Mustafa b. Mehmed, Halil Çelebi b. İbrahim, Halil Efendi b. Ahmed Efendi.
|