Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 296 Hüküm no: 244 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Usta’nın vârislerinin terekeden hisselerini alarak birbirlerinin zimmetlerini ibra etmeleri Havâss-ı Refîʻa kazâsına tâbi‘ Cuhûd Bergos karyesinde vâki‘ Hadîka-i Hâssa ustası iken bundan akdem vefât eden Mustafa Usta Ağa b. Mehmed’in verâseti zevce-i menkûha-i metrûkesi Hadice Hatun bt. Mehmed ile sulbî kebîr oğlu Bostanî Mehmed’e ve sagīr oğlu Mustafa’ya ve sadriye kebîre kızı Âişe Hatun’a münhasıra ve tashîh-i meseleleri kırk sehmden i‘tibâr olunup sihâm-ı mezbûreden beş sehmi zevcesi mezbûreye ve on dörder sehmi oğulları mezbûrân Bostanî Mehmed ve Mustafa’dan herbirine ve yedi sehmi kızı mezbûre Âişe Hatun’a isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Âişe Hatun meclis-i şer‘-i şerîf-i enverde sagīr-i mezbûrun vâlidesi ve tesviye-i umûruna mansûbe vasiyyesi olup tereke-i müteveffâ-i mezbûra bi’l-verâse ve bi’l-vesâye vâzıʻayi’l-yed olan işbu râfiʻayü’l-kitâb mezbûre Hadice Hatun ile merkūm Bostanî Mehmed mahzarlarında bi’l-verâse ikrâr-ı tâm ve takrîr-i kelâm edip babam müteveffâ-i mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere eşyâdan ve menzilden hisseme isâbet eden elli bin dokuz yüz doksan yedi akçeyi mezbûrân Hadice ve Bostanî Mehmed bana def‘ ve teslîm, ben dahi ber-vech-i muharrer meblağ-ı mezbûru yedlerinden bi’l-verâse ahz u kabz eyledim, baʻde’l-yevm müteveffâ-i mezbûrun medîne-i Eyüb’de Câmi‘-i Kebîr Mahallesiʼnde vâki‘ nısf menzilde olan hisse-i irsiyyeme ve sâir terekesinden hâric ez-defter ve dâhil-i defter kalîl ve kesîr, celîl ve hakīr, ma‘lûm ve mechûle müte‘allika âmme-i mîrâs da‘vâsından mezbûrân Hadice ve Bostanî Mehmed’in zimmetlerini bi’l-verâse ibrâ ve ıskāt eyledim vechen mine’l-vücûh ve sebeben mine’l-esbâb katʻâ da‘vâ ve nizâ‘ım yokdur dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’s-sâlis min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: Mustafa Odabaşı b. ( ), es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, Halil Çelebi b. İbrahim, Hüseyin Çelebi b. Mehmed.