.:: İstanbul Kadı Sicilleri ::.


Eyüp Mahkemesi 175 Numaralı Sicil (H. 1157-1159 / M. 1745-1746)
cilt: 71, sayfa: 303
Hüküm no: 248
Orijinal metin no: [63a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yağcı tâifesinden el-Hâc Hasan’ın vefât eden el-Hâc Osman Ağa’daki alacağını terekesinden almak istemesi

Husûs-ı âti’l-beyânın mahallinde istimâ‘ ve tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden olup sâbıkā bostancıbaşı iken bundan akdem vedâʻ-ı âlem-i fânî eden el-Hâc Osman Ağa b. Hüseyin’in hayâtında sâkin oldukları menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde yağcı tâifesinden işbu râfiʻü’l-kitâb el-Hâc Hasan b. Mehmed nâm kimesne meclis-i ma‘kūd-ı mezkûrda müteveffâ-i mezbûrun zâhirde zevce-i menkûha-i metrûkesi Fâtıma Hatun bt. Mustafa’dan gayrı vâris-i ma‘rûfu olmayıp bilâ-vâris fevt olanların beytülmâlını bâ-hatt-ı hümâyûn-ı şevket-makrûn kabza meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn hâlâ bi’l-fi‘il Bostancıbaşı Hüseyin Ağa b. Mustafa Ağa hazretleri taraf-ı bâhir-i şerîflerinden vekîl-i sâbitü’l-vekâle vekîli ve hâlâ terekecibaşı fahrü’l-akrân Mustafa Ağa b. İsmail ile müteveffâ-i mezbûrun sülüsünü tenfîze bâ-hüccet-i şer‘iyye vasiyy-i muhtârı olup tereke-i müteveffâ-i mûmâ-ileyhime bi’l-emâne ve bi’l-vesâye vâzıʻu’l-yed olan Ahmed Ağa b. Mustafa mahzarlarında üzerlerine da‘vâ ve takrîr-i kelâm edip müteveffâ-i mûmâ-ileyh el-Hâc Osman Ağa b. Hüseyin b. Abdullah zimmetinde revgan-ı sâde bahâsından ba‘de külli’l-hesâb dört bin beş yüz akçe hakkım olup hatta müteveffâ-i mûmâ-ileyh hâl-i hayâtında ve kemâl-i akl [u] sıhhatinde târîh-i kitâbdan iki sene mukaddem meblağ-ı mezbûr cihet-i merkūmeden bana zimmetinde vâcibü’l-edâ deyni olduğunu huzûr-ı Müslimîn’de ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i Üsküdar’da Reis Mahallesiʼnde sâkin Mustafa Beşe b. Ali ve Ali Çelebi b. Seydî nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mûmâ-ileyh el-Hâc Osman Ağa b. Hüseyin b. Abdullah zimmetinde revgan-ı sâde bahâsından ba‘de külli’l-hesâb işbu müdde‘î-i mezbûr el-Hâc Hasan’ın dört bin beş yüz akçe hakkı olup hatta müteveffâ-i mûmâ-ileyh hâl-i hayâtında ve kemâl-i akl [u] sıhhatinde târîh-i kitâbdan iki sene mukaddem meblağ-ı mezbûr cihet-i merkūmeden işbu müdde‘î-i mezbûra zimmetinde vâcibü’l-edâ deyn olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tasdîki’ş-şerʻî mûcebiyle baʻde’l-hükm mâ-vaka‘a bi’t-taleb ketb olundu.

Fi’l-yevmi’s-sâdis aşer min-Rebîʻi’l-evvel li-sene tisʻa ve hamsîn ve mi’e ve elf.

Şuhûdü’l-hâl: İbrahim Haseki Ağa b. Abdullah, Bostanî İbrahim Ağa b. Mehmed, Abdullah Usta Ağa b. Abdülbaki, Destârî Hasan Ağa b. Mirza?, Ahmed Efendi b. Ali.