Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 305 Hüküm no: 249 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın vârislerinin kendilerine intikal eden ev ve dükkanları Halil Ağa b. Eyüb’e satmaları Havâss-ı Refîʻa kazâsı muzâfâtından kasaba-i Midye’de sâkin iken bundan akdem vefât eden Ali Ağa b. Hüseyin’in verâseti zevce-i menkûha-i metrûkesi Rukiye Hatun bt. Mehmed ile sulbî sagīr oğlu Ömer’e ve sulbiye kebîre kızı Emetullah Hatun’a ve sulbiye sagīre kızları Memnune ve Hadice’ye münhasıra ve tashîh-i meseleleri kırk sehmden i‘tibâr olunup sihâm-ı mezbûreden beş sehmi zevcesi mezbûreye ve on dört sehmi sagīr-i mezbûr Ömer’e ve yedişer sehmi kızları mezbûrât Emetullah ve Memnune ve Hadice’den herbirilerine isâbet tahakkukundan sonra sıgār-ı mezbûrûnun vâlideleri ve tesviye-i emirlerine vasiyyeleri olan mezbûre Rukiye Hatun’un dâmâdı ve tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân Mehmed Beşe b. Ali ve İsmail Beşe b. Ahmed şehâdetleriyle şer‘an vekâleti sâbit olup ve kezâlik mezbûre Emetullah Hatun’un zevci ve tarafından husûs-ı âti’l-beyânda vekîl olduğu zât-ı mezbûreyi mu‘arrefân-ı mezbûrân Mehmed Beşe ve İsmail Beşe şehâdetleriyle vekâleti şer‘an sâbit olan Halil Ağa b. Mehmed nâm kimesne meclis-i şer‘-i şerîf-i enverde işbu râfiʻü’l-kitâb diğer Halil Ağa b. Eyüb mahzarında bi’l-vekâle ikrâr-ı tâm ve takrîr-i kelâm edip müteveffâ-i mezbûrun ile’l-vefât yedinde mülkü ve hakkı olup sâlifü’z-zikr kasabada vâki‘ bir tarafdan Yanaki Reis mülkü ve bir tarafdan Serezalı Mihal mülkü ve bir tarafdan kenîse ve bir tarafdan tarîk-i âm ile mahdûd iki bâb fevkānî oda ve bir sofa ve tahtında bir ahır ve bir anbar ve kenîf ve havluyu muhtevî mülk menzil ile ittisâlinde vâki‘ bir berber dükkânı ve bir terzi dükkânlarından tashîh-i merkūm üzere isâbet eden hisse-i irsiyyelerini verese-i kibâr âhara beyʻ murâd eylediklerinde sıgār-ı mezbûrûnun hisseleri ifrâz mümkün olmadığından mâ‘adâ zikri mürûr eden menzil ile iki aded dükkânlar müddet-i medîd harâbe müşrif olup hâsılı harcına vefâ etmeyip sıgār-ı mezbûrûnun nafaka ve kisveye dahi eşedd-i ihtiyâçları olmağla verese-i kibârın hisseleriyle sıgār-ı mezbûrûnun hisselerini ma‘an [63b] bi’l-izni’ş-şer‘î mahallinde baʻde’l-müzâyede ve inkıtâʻi’r-rağbe semen-i misliyle âhara beyʻa kıbel-i şer‘den me’zûn olunduğuna binâen sâlifü’z-zikr menzil ve iki aded dükkânlar mahallinde sûk-ı sultânîde müzâyede olunup ragabât-ı nâs bi’l-külliye münkatıʻa oldukdan sonra mezbûr diğer Halil Ağa üzerinde iki yüz elli guruş da karâr edip ziyâde ile tâlib-i âharı zuhûr etmeyip ve meblağ-ı mezbûr sâlifü’z-zikr menzil ile iki aded dükkânların el-yevm semen-i misli olduğunu zeyl-i vesîkada muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr diğer Halil Ağa’ya semen-i misli olan meblağ-ı mezbûr iki yüz elli guruşa bi’l-vekâle beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen-i misli olan meblağ-ı mezbûr iki yüz elli guruşu mezbûr diğer Halil Ağa yedinden bi’l-vekâle bi’t-tamam ahz u kabz eyledim, baʻde’l-yevm menzil-i mahdûd-ı mezkûr ile zikr olunan iki aded dükkânlar mezbûr diğer Halil Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’r-râbiʻ ve’l-ışrîn min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: Osman Ağa b. İbrahim, Eyüb Ağa b. Kanber, es-Seyyid Halil Ağa b. Mehmed, Mustafa Beşe b. Mehmed, es-Seyyid Ahmed b. ( ), Serdaroğlu Mehmed Beşe b. Ali.