Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 327 Hüküm no: 267 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un vefât eden kocası el-Hâc Osman Ağa’nın terekesinden mehir alacağını talebi Husûs-ı âti’l-beyânın mahallinde istimâ‘ ve tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden sâbıkā bostancıbaşı olup bundan akdem vedâʻ-ı âlem-i fânî eden el-Hâc Osman Ağa b. Hüseyin’in hayâtında sâkin oldukları menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî ettikde müteveffâ-i mûmâ-ileyhin zevce-i menkûha-i metrûkesi işbu râfiʻatü’l-kitâb Fâtıma Hatun bt. Mustafa tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan el-Hâc Mahmud b. Osman ve Ömer [b.] Osman nâm kimesneler şehâdetleriyle vekâleti sâbit olan Destârî el-Hâc Hasan Ağa b. Mirza meclis-i ma‘kūd-ı mezkûrda müteveffâ-i mûmâ-ileyhin zâhirde zevce-i müvekkile-i mezbûre Fâtıma Hatun’dan gayrı vâris-i ma‘rûfesi olmayıp bilâ-vâris fevt olanların beytülmâlını bâ-hatt-ı hümâyûn-ı şevket-makrûn kabza meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn bi’l-fi‘il Bostancıbaşı Hüseyin Ağa hazretleri taraf-ı bâhirü’ş-şerîflerinden vekîl-i sâbitü’l-vekâle vekîli ve hâlâ terekecibaşılığı hizmetleriyle şeref-mend olan fahrü’l-akrân Mustafa Ağa b. İsmail ile müteveffâ-i mûmâ-ileyhin sülüsünü tenfîze bâ-hüccet-i şer‘iyye vasiyy-i muhtârı ve tereke-i müteveffâ-i mûmâ-ileyhe herbiri bi’l-emâne ve bi’l-vesâye vaz‘-ı yed eden Ahmed Ağa b. Mustafa mahzarlarında üzerlerine da‘vâ ve takrîr-i kelâm edip müvekkilem mezbûre Fâtıma Hatun’un zevci müteveffâ-i mûmâ-ileyh el-Hâc Osman Ağa b. Hüseyin b. Abdullah zimmetinde mütekarrer ve ma‘kūdün-aleyh otuz bin akçe mehr-i müeccel hakkı olup hatta müteveffâ-i mûmâ-ileyh hâl-i hayâtında ve kemâl-i akl [u] sıhhatinde fevtinden üç sene mukaddem zevcesi müvekkile-i mezbûre Fâtıma Hatun’a zimmetinde ol mikdâr akçe mehr-i müeccel deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden bi’l-vekâle taleb ederim, suâl olunsun dedikde gıbbe’s-suâl ve’l-inkâr vekîl-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Ahmed Efendi b. Ali ve Ahmed Çelebi b. Derviş nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka işbu müvekkile-i mezbûre Fâtıma Hatun’un zevci müteveffâ-i [mûmâ]-ileyh el-Hâc Osman Ağa b. Hüseyin b. Abdullah zimmetinde mütekarrer ve ma‘kūdün-aleyh otuz bin akçe mehr-i müeccel hakkı [69b] olup hatta müteveffâ-i mûmâ-ileyh hâl-i hayâtında ve kemâl-i akl [u] sıhhatinde fevtinden üç sene mukaddem zevcesi müvekkile-i mezbûre Fâtıma Hatun’a zimmetinde ol kadar akçe mehr-i müeccel deyn olduğunu huzûrumuzda kirâren ve mirâren ikrâr ve bizi işhâd eyledi, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemîni’l-müvekkili’l-mezbûre baʻde’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min-Rebîʻi’l-evvel sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.