Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 327 Hüküm no: 266 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehter el-Hâc Mehmed’in vefâtı sonrası küçük oğluna vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Düğmeciler Mahallesiʼnde sâkin iken bundan akdem vefât eden Mehter el-Hâc Mehmed b. Ahmed’in sulbî sagīr oğlu İbrahim’in tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu râfiʻatü’l-kitâb Hanife Hatun bt. Abdullah[‘ı] hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Rebîʻülâhir li-sene tisʻa ve hamsîn ve mi’e ve elf. Şuhûdü’l-hâl: Süleyman Çelebi [b.] Ali, Süleyman Ağa b. Hasan, es-Seyyid Veli b. Osman, İbrahim [b.] Mehmed, el-Hâc Hüseyin [b.] İbrahim, Halil Efendi el-Mukayyid.