Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 330 Hüküm no: 270 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un hayatta iken mehr-i müeccel hakkını kocasına hibe etmiş olduğu Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Ahmed Efendi b. Mustafa Efendi irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesiʼnde sâkine iken bundan akdem vefât eden Fâtıma Hatun bt. Derviş Ahmed’in hayâtında [sâkin] olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin verâseti zevc-i metrûku Osman Çelebi b. Mehmed ile sadriye sagīre kızı Hanife ve babası mezbûr Derviş Ahmed b. Mehmed’e münhasıra ve tashîh-i meseleleri on iki sehmden i‘tibâr olunup sihâm-ı mezbûreden üç sehmi mezbûr Osman Çelebi’ye ve altı sehmi sagīre-i mezbûreye ve bâkī üç sehmi babası merkūm Derviş Ahmed’e isâbeti tahakkukundan sonra mezbûr Derviş Ahmed meclis-i ma‘kūd-ı mezkûrda müteveffât-ı mezbûrenin zevci ve sadriye sagīre kızı Hanife’nin babası ve tesviye-i umûruna kıbel-i şer‘den bâ-hüccet-i şer‘iyye mansûb vasîsi olup tereke-i müteveffât-ı mezbûre bi’l-verâse ve bi’l-vesâye vaz‘-ı yed eden işbu râfiʻü’l-kitâb mezbûr Osman Çelebi mahzarında bi’l-verâse üzerine da‘vâ ve takrîr-i kelâm edip kızım müteveffât-ı mezbûrenin zevci mezbûr Osman Çelebi zimmetinde mütekarrer ve ma‘kūdün-aleyh yedi bin akçe mehr-i müeccel hakkı olup fevt olmağla meblağ-ı mezbûrdan tashîh-i merkūm üzere isâbet eden hisse-i irsiyyemi merkūm Osman bi’l-verâse taleb ederim, suâl olunsun dedikde gıbbe’s-suâl mezbûr Osman Çelebi cevâbında mehr-i müeccel-i mezkûru ikrâr lâkin zevcem müteveffât-ı mezbûre Fâtıma Hatun bt. Derviş Ahmed b. Mehmed hâl-i hayâtında ve kemâl-i akl [u] sıhhatinde fevtinden altı sene mukaddem mehr-i müecceli olan meblağ-ı mezbûr yedi bin akçeyi huzûr-ı Müslimîn’de bana hibe ve temlîk edip ben dahi meclis-i hibede baʻde’l-ittihâb ve’l-kabûl ve ber-vech-i muharrer kirâren ve mirâren ikrâr ve işhâd etmiş idi deyü ba‘de’d-def‘ ve’l-istintak ve’l-inkâr dâfi‘-i mezbûrdan def‘-i meşrûhunu mutâbıka beyyine taleb olundukda udûl-ı ahrâr-ı ricâl-i Müslimîn’den medîne-i mezbûre sâkinlerinden eş-Şeyh el-Hâc İbrahim Efendi b. Mehmed ve Mehmed Ali Çelebi b. İbrahim nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffât-ı mezbûre Fâtıma Hatun bt. Derviş Ahmed b. Mehmed hâl-i hayâtında ve kemâl-i akl [u] sıhhatinde zevci dâfi‘-i mezbûr Osman Çelebi zimmetinde mütekarrer ve ma‘kūdün-aleyh mehr-i müecceli olan yedi bin akçeyi işbu zevci dâfi‘-i mezbûr Osman Çelebi’ye bizim huzûrumuzda hibe ve temlîk edip ol dahi meclis-i hibede baʻde’l-ittihâb ve’l-kabûl ve ber-vech-i muharrer kirâren ve mirâren ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle baʻde’l-hükm müdde‘î-i mezbûr ol vechile bî-vech mu‘ârazadan men‘-birle vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Rebîʻülâhir sene tisʻa ve hamsîn ve mi’e ve elf, 1159. Şuhûdü’l-hâl: Eş-Şeyh el-Hâc İbrahim Efendi, es-Seyyid Ahmed [b.] es-Seyyid Mehmed, es-Seyyid Mehmed [b.] es-Seyyid Mustafa, Hasan Beşe [b.] Safer, el-Hâc İbrahim b. Mehmed, Mollâ Mehmed [b.] Mustafa, Feyzullah Çelebi b. Mustafa.