Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 333 Hüküm no: 273 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Osman Ağa’nın terekesinden olup vasiyeti ve beytülmâla intikal eden evdeki hisselerin hanımına satılması Husûs-ı âti’l-beyânın mahallinde ketb u tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden sâbıkā bostancıbaşı olup bundan akdem vedâʻ-ı âlem-i fânî eden el-Hâc Osman Ağa b. Hüseyin’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mûmâ-ileyhin zâhirde zevce-i menkûha-i metrûkesi [71a] Fâtıma Hatun bt. Mustafa’dan gayrı vâris-i ma‘rûfesi olmayıp müteveffâ-i mûmâ-ileyhin sülüs vasiyyeti olmağla tashîh-i meselesi on iki sehmden i‘tibâr olunup sihâm-ı mezbûreden dört sehmi sülüs vesâyâsına ve iki sehmi zevcesi mezbûreye ve altı sehmi cânib-i beytülmâla âid ve râciʻ olduğu şer‘an zâhir ve müteʻayyen oldukdan sonra müteveffâ-i mûmâ-ileyhin terekesini bâ-hatt-ı hümâyûn-ı şevket-makrûn beytülmâl kabzına meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn bi’l-fi‘il bostancıbaşı sa‘âdetlü Hüseyin Ağa hazretleri taraf-ı bâhirü’ş-şerîflerinden sâbitü’l-vekâle vekîli ve hâlâ terekecibaşı hizmetleriyle şeref-mend olan fahrü’l-akrân Haseki Mustafa Ağa b. İsmail ile müteveffâ-i mûmâ-ileyhin sülüsünü tenfîze bâ-hüccet-i şer‘iyye vasiyy-i muhtârı olan Ahmed Ağa b. Mustafa meclis-i ma‘kūd-ı mezkûrda müteveffâ-i mûmâ-ileyhin zevcesi işbu râfiʻatü’l-kitâb mezbûre Fâtıma Hatun mahzarında herbiri bi’l-vekâle ve bi’[l-ve]sâya ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan fahrü’l-müderrisîni’l-kirâm Derviş Mustafa Efendi mülkü ve bir tarafdan bostan ve bir tarafdan Şiʻranzâde Abdullah Efendi menzili ve bir tarafdan tarîk-i âm ile mahdûd büyût-ı adîdeyi muhtevî mülk menzilin rub‘ hissesi müteveffâ-i mûmâ-ileyhin yedinde mülkü ve hakkı olduğu müsbet olmağla ber-vech-i muharrer menzil-i mahdûd-ı mezkûrda olan müteveffâ-i mûmâ-ileyhin rub‘ hissesinden tashîh-i merkūm üzere dört sehmi sülüs vesâyâsına ve altı sehmi beytülmâla isâbet eden hisselerini cemî‘ tevâbiʻ ve levâhıkıyla tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile yüz yirmi beş bin akçeye mezbûre Fâtıma Hatun’a herbirimiz bi’l-vekâle ve bi’l-vesâya beyʻ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz yirmi beş bin akçeyi merkūme Fâtıma Hatun yedinden herbirimiz bi’l-vekâle ve bi’l-vesâya bi-kadri’l-hısas bi’t-tamam ahz u kabz eyledik, baʻde’l-yevm rub‘ hissede olan tashîh-i merkūm üzere on sehm hisse mezbûre Fâtıma Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Rebîʻi’l-evvel li-sene tisʻa ve hamsîn ve mi’e ve elf, 1159. Şuhûdü’l-hâl: Es-Seyyid Ali Usta Ağa, İsmail Efendi [b.] Mahmud, Bazarcı Hüseyin b. Mustafa, İbrahim Ağa [b.] Mehmed, el-Hâc Mahmud [b.] Osman, Mollâ Ömer [b.] Osman, Ali b. Abdullah.