Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 334 Hüküm no: 274 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Osman Ağa’nın vefâtından önce vasiyetini yerine getirmek üzere Ahmed Ağa’yı vasi tayin ettiği Husûs-ı âti’l-beyânın mahallinde istimâ‘ ve tahrîri için bu fakīr medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden sâbıkā bostancıbaşı olup bundan akdem vedâʻ-ı âlem-i fânî eden el-Hâc Osman Ağa b. Hüseyin’in hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mûmâ-ileyhin ber-vech-i âtî vasiyy-i muhtârı olduğunu iddiʻâ eden işbu râfiʻü’l-kitâb Ahmed Ağa b. Mustafa meclis-i ma‘kūd-ı mezkûrede müteveffâ-i mûmâ-ileyhin zâhirde zevce-i menkûha-i metrûkesi Fâtıma Hatun bt. Mustafa’dan gayrı vâris-i ma‘rûfesi olmayıp terekesi cânib-i beytülmâla âid ve râciʻ olduğu şer‘an zâhir ve müteʻayyen oldukdan sonra müteveffâ-i mûmâ-ileyhin terekesi bâ-hatt-ı hümâyûn-ı şevket-makrûn beytülmâl kabzına meʼmûr olan iftihârü’l-havâs ve’l-mukarrabîn muʻtemedü’l-mülûk ve’s-selâtîn bi’l-fi‘il bostancıbaşı devletlü Hüseyin Ağa hazretlerinin taraf-ı bâhirü’ş-şerîflerinden sâbitü’l-vekâle vekîli ve hâlâ terekecibaşı hizmetleriyle şeref-mend olup tereke-i müteveffâ-i mûmâ-ileyhe bi’l-vekâle vaz‘-ı yed eden fahrü’l-akrân Mustafa Ağa b. İsmail mahzarında üzerine da‘vâ ve takrîr-i kelâm edip işbu yedimde olan vasiyyet hücceti ile kezâlik müteveffâ-i mûmâ-ileyhin imzâsıyla mümzâ vasiyyetnâme nâtıkı olduğu üzere müteveffâ-i mûmâ-ileyh el-Hâc Osman Ağa b. Hüseyin b. Abdullah hâl-i hayâtında ve kemâl-i akl [u] sıhhatinde fevtinden bir ay mukaddem ben bi-emri’llâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemin sülüsü ifrâz olunup sülüs-i mezbûrdan üç yüz guruş ta‘mîr-i kabrim için harc u sarf oluna ve iki yüz guruş dahi ıskāt-ı salât-ı fâʼitem oluna ve herbiri otuzar guruş kıymetli dokuz aded [71b] mushaf-ı şerîf iştirâ olunup Hadîka-i Hâssa’da vâki‘ dokuz aded odanın herbirine bireri hıfz olunup tilâvet ve kırâet oluna ve Hadîka-i Hâssa’da Orta-yı Kebîr’e dört yüz guruş verile ve müdebbirelerim Süleyman ve Hasan ve Meryem ve Hanım’dan herbirine ellişer guruş verile ve el-Hâc Mahmud ve diğer Küçük el-Hâc Mahmud ve Mollâ Ömer ve Ali’den herbirine kezâlik ellişer guruş verile ve müdebbire Hanım câriye bin akçe kıymetli bir velençe ve iki yasdık ve bir minder ve bir baş yasdığı verile ve iki bin akçe kıymetli dört beledî yasdık ve iki kadife yasdık ve iki minder ve iki velençe ve bir orta keçesi ve bir köhne kapı perdesi el-Hâc Mahmud’a verile ve medîne-i mezbûrede Otakçıbaşı Mahallesi’nde binâ eylediğim kabrim karşısında binâ olunan tekye-i cedîdde post-nişîn fahrü’l-meşâyihü’l-kirâm eş-Şeyh Abdulkādir Efendi’ye vakfiyet üzere dokuz yüz guruş teslîm, ol dahi baʻde’l-kabz onu on bir hesâbı üzere rehn-i kavî ve kefîl yâhud ikisinden biri ile alâ-vechi’l-helâl istirbâh olunup cihet-i tevliyet yevmî iki akçe olup tekye-i mezbûrede her kim şeyh olursa eylediğim vakfa mütevellî ola, küllü yevm üçer İhlâs ve bir Fâtiha-i şerîf tilâvet olunup sevâbını Resul-i kibriyâ Muhammed Mustafa -sallallâhu te‘âlâ aleyhi ve sellem- hazretlerinin rûh-ı pâk-ı mutahharlarına ve ashâb-ı kibriyâ -rıdvânullâhi te‘âlâ aleyhin ecmaʻîn- hazretlerine ve sâir müʼminîn ve müʼminâtın ve benim rûhuma ihdâ edip mukābelesinde yüz guruşdan hâsıl gallesine mutasarrıf ola ve senede Mevlid-i şerîf kırâet için meblağ-ı mezbûrdan üç yüz guruşdan hâsıl olan mikdârı ol vakitde harc u sarf oluna ve meblağ-ı mezbûrdan beş yüz guruşdan hâsılı tekye-i mezbûrede mesâkîn-i fukarâ-yı Müslimîn için taʻâmiyeleri husûsuna harc u sarf oluna ve husûs-ı mezbûrede alâ-vechi’l-ihtimâm nezâret etmek üzere Esʻad Efendi nâm kimesne hasbî nâzır ola ve sülüs-i mezbûrdan her ne bâkī kalırsa vücûh-ı birre harc u sarf oluna deyü vasiyyet ve tenfîzine huzûr-ı Müslimîn’de beni vasiyy-i muhtâr nasb u ta‘yîn eylediğinde ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mûmâ-ileyh el-Hâc Osman Ağa musırran alâ-îsâʼihî fevt olmağla tenfîz-i vesâyâ murâd eylediğimde vekîl-i mezbûr Mustafa Ağa mâni‘ olur, suâl olunsun dedikde gıbbe’s-suâl merkūm Mustafa Ağa cevâbında tereke-i müteveffâ-i mûmâ-ileyhe bi’l-vekâle vaz‘-ı yedini ikrâr lâkin müdde‘î-i mezbûrun ber-vech-i muharrer vasiyy-i muhtâr olduğunu inkâr edicek, müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûrede sâkin Ahmed Efendi b. Ali ve Vâlide Saray ustası es-Seyyid Ali Ağa b. Mustafa ve el-Hâc Hasan Ağa b. Mirza ve İbrahim Ağa b. Mustafa ve Ahmed b. Derviş ve el-Hâc Mahmud b. Osman ve Mollâ Ömer b. Osman nâm kimesneler li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka işbu müdde‘î-i mezbûr Ahmed Ağa’nın yedinde olan vasiyyet hücceti ile kezâlik müteveffâ-i mûmâ-ileyhin imzâsıyla vasiyyetnâme nâtık olduğu üzere müteveffâ-i mûmâ-ileyh el-Hâc Osman Ağa b. Hüseyin b. Abdullah hâl-i hayâtında ve kemâl-i akl [u] sıhhatinde fevtinden bir ay mukaddem ben bi-emri’llâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görülüp düyûn-ı müsbetem edâ olundukdan sonra bâkī kalan terekemin sülüsü ifrâz olunup sülüs-i mezbûrdan üç yüz guruş ta‘mîr-i kabrim için harc u sarf oluna ve iki yüz guruş dahi ıskāt-ı salât-ı fâʼitem oluna ve herbiri otuz guruş kıymetli dokuz aded Mushaf-ı şerîf iştirâ olunup Hadîka-i Hâssa’da vâki‘ dokuz aded odanın herbirine bireri hıfz olunup tilâvet ve kırâet oluna ve Hadîka-i Hâssa’da Orta-yı Kebîr’e dört yüz guruş verile ve müdebbirelerim Süleyman ve Hasan ve Meryem ve Hanım’dan herbirine ellişer guruş verile ve el-Hâc Mahmud ve diğer Küçük el-Hâc Mahmud ve Mollâ Ömer ve Ali’den herbirine kezâlik ellişer guruş verile ve müdebbirem Hanım câriye bin akçe kıymetli bir velençe ve iki yasdık ve bir minder ve baş yasdığı verile ve iki bin akçe kıymetli dört beledî yasdık ve iki kadife yasdık ve iki minder ve iki velençe ve bir orta keçesi ve bir köhne kapı perdesi el-Hâc Mahmud’a verile ve medîne-i mezbûrede Otakçıbaşı Mahallesi’nde binâ eylediğim kabrim karşısında binâ olunan tekye-i cedîde post-nişîn fahrü’l-meşâyihü’l-kirâm eş-Şeyh Abdulkādir Efendi’ye vakfiyet üzere dokuz yüz guruş teslîm ol dahi baʻde’l-kabz onu on bir hesâbı üzere rehn-i kavî ve kefîl yâhud ikisinden biri ile alâ-vechi’l-helâl istirbâh olunup cihet-i tevliyet yevmî iki akçe olup tekye-i mezbûrede her kim şeyh olursa eylediğim vakfa mütevellî ola, küllü yevm üçer İhlâs ve bir Fâtiha-i şerîf tilâvet olunup sevâbını Resul-i Kibriyâ Muhammed Mustafa -sallallâhu aleyhi ve sellem- hazretlerinin rûh-ı mutahharlarına ve ashâb-ı kibriyâ -rıdvânullâhi te‘âlâ aleyhim ecmaʻîn- hazretlerine ve sâir müʼminîn ve müʼminâtın ve benim rûhuma ihdâ edip mukābelesinde yüz guruşdan hâsıl gallesine mutasarrıf ola ve senede Mevlid-i şerîf kırâet için meblağ-ı mezbûrdan üç yüz guruşdan hâsıl olan mikdârı ol vakitde harc u sarf oluna ve meblağ-ı mezbûrdan beş yüz guruşdan hâsılı tekye-i mezbûrede mesâkîn-i fukarâ-yı Müslimîn için taʻâmiyeleri husûsuna harc u sarf oluna ve husûs-ı mezbûrede alâ-vechi’l-ihtimâm nezâret etmek üzere Esad Efendi nâm kimesne hasbî nâzır ola ve sülüs-i mezbûrdan her ne [72a] bâkī kalırsa vücûh-ı birre harc u sarf oluna deyü vasiyyet ve tenfîzine müdde‘î-i mezbûr Ahmed Ağa’yı huzûrumuzda vasiyy-i muhtâr nasb u ta‘yîn eylediğinde ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mûmâ-ileyh el-Hâc Osman Ağa musırran alâ-îsâʼihî vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle müdde‘î-i mezbûrun vesâyetine baʻde’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min-Rebîʻi’l-evvel li-sene tisʻa ve hamsîn ve mi’e ve elf. Şuhûdü’l-hâl: İbrahim Haseki Ağa b. Abdullah, İbrahim Ağa b. Abdülbaki, İsmail Efendi b. Mahmud, Bazarcı Hüseyin b. Mustafa, es-Seyyid Mehmed b. es-Seyyid Mustafa, es-Seyyid Ahmed b. es-Seyyid Mehmed, Halil Efendi b. İbrahim.