Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 346 Hüküm no: 286 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin terekesi malından küçük kızı Saime’ye nafaka tayin edilmesi Havâss-ı Refîʻa kazâsına tâbi‘ Pirinççi karyesinde sâkin iken bundan akdem vefât eden Mehmed Beşe b. Mustafa’nın sulbiye sagīre kızı Saime’nin tevsiye-i umûruna bâ-hüccet-i şer‘iyye mansûb vasîsi olan işbu râfiʻü’l-kitâb sagīre-i mezbûrenin ammizâdesi Salih Beşe b. Ali meclis-i şer‘-i şerîf-i enverde takrîr-i kelâm ve tâʻbir ani’l-merâm edip [74b] vasîsi olduğum mezbûrenin babası müteveffâ-i mezbûrdan müntakil mâlından kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin babası müteveffâ-i mezbûrdan müntakil mâlından beher yevm sagīre-i mezbûra üçer akçe nafaka ve kisve-bahâ farz ve takdîr buyurduklarında meblağ-ı mefrûz-ı mezbûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer mâlına rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Cemâziyelevvel sene 1159. Şuhûdü’l-hâl: Eş-Şâhidûnü’s-sâbıkūn.