Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 346 Hüküm no: 285 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin vefâtıyla küçük kızı Saime’ye amcasıoğlu Salih Beşe’nin vasi tayin edilmesi Havâss-ı Refîʻa kazâsına tâbi‘ Pirinççi karye[sinde] sâkin iken bundan akdem vefât eden Mehmed Beşe b. Mustafa’nın sulbiye sagīre kızı Saime’nin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukar[rer] olan sagīre-i mezbûrenin ammizâde[si] işbu râfiʻü’l-kitâb Salih Beşe b. Ali’yi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sagīre-i mezbûrenin tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Ahmed Beşe [b.] Mustafa, Mehmed Beşe [b.] Ali, Hüseyin Beşe [b.] Mustafa, Ali Beşe [b.] Mustafa, İmâm Ahmed Efendi [b.] Mustafa, Ahmed Çelebi [b.] Ali.