Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 348 Hüküm no: 288 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın vefât eden Karcıbaşızâde el-Hâc Mustafa’daki alacağını terekesinden tahsili Husûs-ı âti’l-beyânın mahallinde istimâʻ u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa b. Osman’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun evlâd-ı sıgārının tesviye-i emirlerine vasiyy-i muhtârları olan işbu râfiʻü’l-kitâb Mehmed Ağa b. İbrahim Efendi meclis-i ma‘kūd-ı mezkûrda müteveffâ-i mezbûrun zevce-i menkûha-i metrûkeleri olup tereke-i müteveffâ-i mezbûra bi’l-verâse vâzıʻateyi’l-yed olan zâtları zeyl-i vesîkada muharrerü’l-esâmî Müslimîn ta‘rîfleriyle mu‘arrefe Fethi Hatun bt. Abdullah ve Zeyneb Hatun bt. Mehmed mahzarlarında üzerlerine da‘vâ ve takrîr-i kelâm edip müteveffâ-i mezbûr el-Hâc Mustafa b Osman b. Abdullah zimmetinde cihet-i karz-ı şer‘îden yüz yirmi iki guruş hakkım olup hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden yirmi gün mukaddem cihet-i mezkûreden ol kadar guruş zimmetinde bana vâcibü’l-edâ deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahmiye-i İstanbul’da Kul Câmi‘i Mahallesiʼnde sâkin Mehmed Odabaşı b. Ömer ve Ebûbekir Ağa b. Süleyman nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr el-Hâc Mustafa b. Osman b. Abdullah zimmetinde cihet-i karz-ı [75b] şer‘îden işbu müdde‘î-i mezbûr Mehmed Ağa’nın yüz yirmi iki guruş hakkı olup hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden yirmi gün mukaddem cihet-i mezkûreden müdde‘î-i mezbûra ol kadar guruş zimmetinde vâcibü’l-edâ deyn olduğunu huzûrumuzda kirâren ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘den Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Rebîʻülâhir li-sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.