Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 349 Hüküm no: 289 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keçeci esnafından Mehmed Odabaşı’nın vefât eden el-Hâc Mustafa’daki alacağını terekesinden almak istemesi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Karcıbaşızâde demekle ma‘rûf el-Hâc Mustafa b. Osman’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde keçeci tâifesinden işbu râfiʻü’l-kitâb Mehmed Odabaşı b. Ömer meclis-i ma‘kūd-ı mezkûrda müteveffâ-i mezbûrun sulbî sagīr oğlu Mehmed Emin ile sulbiye sagīre kızı Hadice’nin tesviye-i emirlerine bâ-hüccet-i şer‘iyye vasiyy-i muhtârı olup tereke-i müteveffâ-i mezbûra bi’l-vesâye vaz‘-ı yed eden Mehmed Ağa b. el-Hâc İbrahim Efendi mahzarında üzerine da‘vâ ve takrîr-i kelâm edip müteveffâ-i mezbûr el-Hâc Mustafa b. Osman b. Abdullah zimmetinde beynimizde udûl [adedi] ma‘lûm kar keçesi bahâsından ba‘de külli’l-hesâb yüz on beş guruş hakkım olup hatta müteveffâ-i mezbûr hâl-i hayâtında ve kemâl-i sıhhatinde fevtinden bir ay mukaddem cihet-i merkūmeden meblağ-ı mezbûr ol kadar guruş zimmetinde bana vâcibü’l-edâ deyn olduğunu huzûr-ı Müslimîn’de ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede Düğmeciler Mahallesiʼnde sâkin Mehmed Efendi b. Osman Efendi ve es-Seyyid Ali b. Ömer nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-i mezbûr el-Hâc Mustafa b. Osman b. Abdullah zimmetinde işbu müdde‘î-i mezbûr Mehmed Odabaşı’nın adedi beynlerinde ma‘lûm kar keçesi bahâsından ba‘de külli’l-hesâb yüz on beş guruş hakkı olup hatta müteveffâ-i mezbûr hâl-i hayâtında ve kemâl-i akl [u] sıhhatinde fevtinden bir ay mukaddem cihet-i merkūmeden ol kadar guruş müdde‘î-i mezbûra vâcibü’l-edâ deyn olduğunu huzûrlarımızda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan ümenâ-i şer‘den Çukadâr Ahmed Ağa ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Rebîʻülâhir sene 1159. Şuhûdü’l-hâl: Eş-Şâhidûnü’s-sâbıkūn.