Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 351 Hüküm no: 291 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müezzin Molla Mehmed’in kendisine intikal eden hissesi ile evdeki hissesini satması Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Sofular Mahallesiʼnde sâkine olup zikri âtî menzilin nısf-ı şâyiʻine şirâen mâlike iken bundan akdem vefât eden Hadice Hatun bt. İbrahim Efendi’nin verâseti usûbet-i nesebiyye cihetinden hasren vârisi olduğu inde’ş-şer‘ zâhir ve nümâyân olan Müezzin Mollâ Mehmed b. Osman Efendi ile müteveffât-ı mezbûrenin sülüs vasiyyeti olmağla tashîh-i meselesi üç sehmden i‘tibâr olunup sihâm-ı mezbûreden bir sehmi sülüs vesâyâsına ve iki sehmi mezbûr Mollâ Mehmed’e isâbeti tahakkukundan sonra müteveffât-ı mezbûrenin sülüsünü tenfîze bâ-hüccet-i şer‘iyye vasiyy-i muhtârı olan Akıllızâde el-Hâc Mustafa Efendi b. Mehmed Efendi meclis-i şer‘-i şerîf-i enverde işbu râfiʻü’l-kitâb mezbûr Mollâ Mehmed mahzarında bi’l-vesâye ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Hadice Hatun mülkü ve bir tarafdan Akıllızâde Mehmed Efendi mülkü ve bir tarafdan Şâir Ali Bey veresesi mülkleri ve bir tarafdan tarîk-i âm ile mahdûd iki bâb fevkānî oda ve bir sofa ve dehlîz ve kenîf ve bir hisse biʼr-i mâî müştemil mülk menzilin nısf-ı şâyiʻi müteveffât-ı mezbûrenin ile’l-vefât yedinde mülkü olmağla nısf-ı şâyiʻden tashîh-i merkūm üzere isâbet eden bir sehm hisseyi tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile merkūm Mollâ Mehmed iki bin dört yüz semen-i medfû‘ ve makbûza bi’l-vesâye beyʻ ve temlîk eyledim, baʻde’l-yevm nısf menzil-i mezkûr irsen ve şirâen merkūm Mollâ Mehmed’in mülk-i müşterâsı ve hakk-ı sırfı olmuşdur dedikden sonra merkūm Mollâ Mehmed dahi meclis-i mezkûrda zevcesi işbu bâ‘isetü’l-kitâb Âişe Hatun bt. Abdullah mahzarında ikrâr-ı tâm ve takrîr-i kelâm edip sâlifü’z-zikr irsen ve şirâen mâlik olduğum nısf menzil-i mahdûd-ı mezkûru cemî‘ tevâbiʻ ve levâhıkıyla tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile zevcem mezbûre Âişe Hatun’a sekiz bin dört yüz akçeye bi’l-verâse beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr sekiz bin dört yüz akçeyi zevcem mezbûre Âişe Hatun yedinden bi’l-verâse ahz u kabz eyledim [76b] baʻde’l-yevm nısf menzil-i mahdûd-ı mezkûr zevcem mezbûre Âişe Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şerʻî mâ-vaka‘a bi’t-taleb ketb olundu. Fi’l-yevmi’s-sâlis min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Mehmed Çelebi b. Abdullah, Musa Bey [b.] Halil Efendi el-Mukayyid, Halil b. İbrahim.